Իսրայելական Mig News-ի փոխանցմամբ՝ Թուրքիայից ներողություն խնդրելու՝ Իսրայելի վարչապետ Բենիամին Նեթանյահուի հրաժարվելը հանգեցնելու է նրան, որ թուրքական կողմը գործի է գցելու այսպես կոչված՝ «Բ» պլանը։
Վերջինս ենթադրում է ՄԱԿ-ի մարմիններում և առաջին հերթին Մարդու իրավունքների Եվրոպական դատարանում Իսրայելի դեմ կոորդինացված դիվանագիտական հարձակում։ Բացի այդ, միջազգային ԶԼՄ-ներում իրականացվելու է լայնամասշտաբ հակաիսրայելական կամպանիա։ «Մավի Մարմարա»-ի միջադեպի արդյունքում զոհված թուրք քաղաքացիների հարազատները եվրոպական դատարաններում անձնական հայցեր կներկայացնեն Իսրայելի ղեկավարության դեմ։
Թուրքիան ավելի է նվազեցնելու Իսրայելում իր դիվանագիտական ներկայացուցչության մակարդակը։ Արդեն մեկ տարուց ավելի է, ինչ Թուրքիան Իսրայելում դեսպան չունի։ Նրա փոխարեն այդ գործառույթներն իրականացնում էր թուրքական առաքելության ղեկավարի տեղակալը, որի աշխատանքային ժամկետն ավարտվում է մոտ օրերս։ Ամենայն հավանականությամբ՝ նրան ոչ ոք չի փոխարինի։
Այն բանից հետո, ինչ Իսրայելը հրաժարվեց Թուրքիայից ներողություն խնդրել, հաջորդ շաբաթ ակնկալվում է «Մավի Մարմարա»-ի վերաբերյալ ՄԱԿ-ի զեկույցը։ Իսրայելի ԱԳՆ-ի ազդեցիկ անձանցից մեկը հրաժարվեց Թուրքիայից ներողություն խնդրել, և դա պայմանավորված է նրանով, որ Իսրայելը ցանկանում է, որ այդ զեկույցը հրապարակվի։
Նա նշում է. «ՄԱԿ-ի զեկույցը հօգուտ Իսրայելի է, թեև նրա հանդեպ այնտեղ քիչ քննադատություն չկա։ Այն շատ վատն է Թուրքիայի համար։ Մենք դռները չենք փակում բանակցությունների համար, մենք պատրաստ ենք վերսկսել դրանք, եթե կատարելապես փոխվի ներողություն խնդրելու թեման»։
Հիշեցնենք, որ հուլիսի վերջին թուրքական Cumhuriyet թերթը գրել էր, որ թուրքական «Բ» պլանը կազմված է երեք բաղկացուցիչ մասերից.
ա) իրավական պայքար – Թուրքիան «Մավի Մարմարա»-ի միջադեպի ժամանակ իսրայելցի զինծառայողների գործողությունների դեմ դիմելու է միջազգային դատարան
բ) երկկողմանի հարաբերություններ – Թուրքիան պատրաստվում է նվազեցնել Իսրայելի հետ դիվանագիտական շփումները՝ ընդհուպ մինչև հարաբերությունների խզում։ Թուրքիան կարող է չընդունել Իսրայելի նորանշանակ դեսպանին։ Հարված կհասցվի նաև թուրք-իսրայելական տնտեսական հարաբերություններին
գ) Գազայի հատված – եթե Իսրայելը չվերացնի Գազայի հատվածի շրջափակումը, ապա Թուրքիան պատրաստվում է միջազգային բոլոր հարթակներում քաղաքական պայքար մղել Իսրայելի դեմ։
