Ֆոտոլրագրող Հայկ Բիանջյանը և «Պետական կարիքների զոհեր» հկ-ի նախագահ Սեդրակ Բաղդասարյանն այսօր հրավիրած ասուլիսում իրենց մտահոգությունը հայտնեցին Երևանում Աֆրիկյանների ընտանիքի 4 տներից 2 պահպանվածներից մեկի՝ Տերյան 11 հասցեում գտնվող շենքի ճակատագրի մասին։
Հիշեցնենք, որ այս շենքը ապամոնտաժելու մասին որոշում է ընդունվել, սակայն տարիների փորձը հուշում է, որ շենքը չի վերականգնվի ինչպես որ կա։ Ապամոնտաժված շենքերը, ըստ բանախոսների, կամ չեն վերականգնվում, կամ վերականգնումից հետո լրիվ այլ տեսք են ստանում, ինչպես օրինակ՝ «Հանրապետական» կուսակցության 1.5 հարկանի շենքը, որ, չգիտես ինչու, դարձել է 3-հարկանի։
«Մեր կառավորությունը խոսում է տուրիստական կենտրոն դառնալու մասին, սակայն ի տարբերություն Թիֆլիսի, որտեղ հին պատմամշակութային արժեք ունեցող շենքերը վերականգնվում են, մեզ մոտ հին շենքերը քանդում են։ Տուրիստները ուզում են հուշաձաններ տեսնել»,- ասում է Հայկ Բիանջյանը։
2004 թ. ընդունվել է որոշում, որ մի քանի պատմական շենքեր պետք է տեղափոխվեն, այդ թվում նաև Աֆրիկյանների շենքը, և ստեղծվի Հին Երևան պատմական թաղամաս՝ Աբովյան, Արամի, Բուզանդ փողոցների շրջանում։ Սակայն այդ կենտրոնը ստեղծելու ուղղությամբ ոչ միայն ոչինչ չի արվում, այլև հին այլ շենքեր են ապամոնտաժվում։
