44-օրյա պատերազմի օրերին ՀՀ կառավարությունն իր 2020 թվականի հոկտեմբերի 20-ի որոշմամբ ժամանակավոր արգելք դրեց թուրքական ծագում ունեցող վերջնական սպառման ապրանքների ներմուծման վրա: 2020 թվականի դեկտեմբերի 31-ից ուժի մեջ մտած արգելքը մեկ անգամ արդեն երկարացվել է 2021-ին։ Հիմնավորումն այն է, որ թուրքական ծագման ապրանքների ներմուծման սահմանափակումն իրենից ենթադրում է նախևառաջ անվտանգային բաղադրիչ՝ հաշվի առնելով քանիցս հաստատված փաստերը, ըստ որոնց, Թուրքիան բացահայտորեն աջակցում ու սատարում է Ադրբեջանի կողմից՝ Արցախի Հանրապետության դեմ սանձազերծված պատերազմական և ահաբեկչական գործողություններին:
Թուրքական ծագմամբ ապրանքների ներմուծման արգելքը երկարաձգվեց 2021-ի դեկտեմբերին, և հիմա էլ Էկոնոմիկայի նախարարությունը այս արգելքը կրկին երկարաձգելու նախագիծ է մշակում այն դեպքում, երբ մի կողմից Թուրքիայի հետ հարաբերությունները կարգավորելու հայտ ենք ներկայացնում, մյուս կողմից ապրանքների ներկրումը արգելելով օրինագիծ ենք ընդունում։
ԱԺ Ֆինանսավարկային և բյուջետային հարցերի մշտական հանձնաժողովի նախագահ, ՔՊ-ական պատգամավոր Գևորգ Պապոյանը «Առաջին լրատվական»-ի հետ զրույցում, անդրադառնալով կրկին երկարաձգելու խնդրին, նշեց, որ հարցը պետք է քննել, հասկանալ. «Թույլ տվեք իմ անձնական կարծիքը ես չհայտնեմ։ Մենք կքննարկենք, միասնական որոշում կկայացնենք։ Կառավարությունը և ԱԺ-ն առանձին չեն, իրար հետ քննարկում են, միասնական որոշում կայացնում»,-ասաց Պապոյանը։
Նա նշեց, որ սեպտեմբեր-հոկտեմբեր ամիսներին մի քանի քննարկման մասնակցել է, որտեղ քննարկել են տնտեսական բաղադիրչը, այսինքն, թե որքանով է հիմնավորված, անհրաժեշտ դրա լինել-չինելը։
Տնտեսական հարցերի մշտական հանձնաժողովի անդամ, ՔՊ-ական մեկ այլ պատգամավոր Հովիկ Աղազարյանն էլ խնդրի հետ կապված նշեց, որ չի կարծում, թե սա խնդիր է, մենք կարող ենք և սահմանափակում անել, և՛ աշխատանքներ իրականացնել հարաբերությունների կարգավորման ուղղությամբ։
«Խնդիրը չպետք է կապել իրար հետ, ինքս չեմ կարծում, թե կա անհրաժեշտություն այս սահմանափակումը երկարաձգելու, որովհետև միևնույն է, մենք Թուրքիայից ինչ-ինչ բաներ բերում ենք, այդ թվում նաև բերում ենք տեքստիլ արդյունաբերության հումք։ Իհարկե, Հայաստանում կան տնտեսագետներ, պաշտոնյաներ, որոնք գտնում են, որ Հայաստանում տեքստիլ արդյունաբերությունը կարող է զարգացում ունենալ, ես գտնում եմ, որ Հայաստանում տեքստիլ արդյունաբերությունը չի կարող հասնել այն արդյունքներին, որ որոշիչ դեր ունենա։ Դրա համար էլ դեմ եմ սահմանափակումները երկկարացնելուն և նաև մեկ ուրիշ պատճառով, որ բոլոր դեպքերում երրորդ երկրների միջոցով առանց հարցերի, ապրանքները բերում են, որտեղ շատ լուրջ կոռուպցիոն ռիսկեր են առաջանում։ Հետևաբար, կոռուպցիոն ռիսկերը բացառելու համար գտնում եմ, որ չարժե երկարաձգել։ ԻՆչ վերաբերում է հայ-թուրքական հարաբերությունների նորմալացմանը, ապա ես կողմ եմ դրան, որովհետև հարևաների հետ մենք պետք է սովորենք ապրել»,-ասաց Աղազարյանը՝ հավելելով, որ թուրքական ապրանքների ներկրման արգելքը պայմանավորված էր պատերազմով և ժամանակավոր միջոցառում էր:
