ԱՄՆ-ի Կոնգրեսի Ներկայացուցիչների պալատն այսօր ընդունել է Ազգային պաշտպանության լիազորման ակտում կոնգրեսական Ֆրենք Փալոնի ներկայացրած փոփոխությունը։ Փոփոխությունը կնպաստի մարդու իրավունքների առաջխաղացմանն ամբողջ աշխարհում՝ պահանջելով պաշտպանության նախարարությունից վերանայել առկա պահանջները օտարերկրյա ազգային անվտանգության ուժերի կողմից մարդու իրավունքների ուսուցում անցկացնելու համար։ Փոփոխությունը կապահովի ԱՄՆ-ի օրենսդրության համապատասխանությունը, որն արգելում է մարդու իրավունքների կոպիտ խախտումներ թույլ տված երկրների ազգային անվտանգության ուժերին դրամական միջոցների հատկացումը:
Ազգային պաշտպանության լիազորման ակտը ներառում է նաև կոնգրեսական Ադամ Շիֆի կողմից ներկայացված ուղղումը, որով կոչ է արվում անհապաղ ազատ արձակել ռազմագերիներին, ինչպես նաև գերված խաղաղ բնակիչներին, որոնց Ադրբեջանի նախագահ Իլհամ Ալիևը շարունակում է պատանդ պահել որպես սակարկության առարկա: Այս ձևակերպումը հետագայում պահանջում է նաև 2020 թվականի աշնանը ադրբեջանական և թուրքական ուժերի կողմից նախաձեռնված մահացու 44-օրյա պատերազմի վերաբերյալ պաշտպանության նախարարության կողմից զեկույց: Զեկույցը պետք է ներկայացնի հակամարտության ընթացքում օգտագործված ամերիկյան զենքերի և տեխնոլոգիական միջոցների մասին փաստեր, արտաքին դերակատարների միջամտության մասին տեղեկություններ, որոնցից մեծապես օգտվել է Ադրբեջանը: Փոփոխությունը պահանջում է նաև, որպեսզի նախարարությունը գնահատական տա 2020 թվականի նոյեմբերի 9-ին ստորագրված հայտարարության պահանջներն անտեսելու փաստերին:
ԱՄՆ-ում լույս տեսնող «Կալիֆորնիա Կյուրիեր» թերթի խմբագիր Հարութ Սասունյանը «Առաջին լրատվական»-ի հետ զրույցում նշեց՝ ԱՄՆ-ում կա երկու պալատ և ցանկացած փոփոխություն պետք է երկու պալատով անցնի․«Հիմա միայն Ներկայացուցիչների պալատն է ընդունել, հետո պետք է գնա Սենատ։Առայժմ վաղ է նշել, որ ինչ-որ բան իրագործվել է կամ հաջողության է հասել»։
Ըստ Սասունյանի՝ ԱՄՆ ՀԱՅ Դատի հանձնախումբը երկար տարիներ աշխատում է նման նախագծերի շուրջ․«Սա էլ ՀԱՅ Դատի հանձնախմբի աշխատանքի արդյունք է։ Անշուշտ միայն հանձնախումբը չէ, մեծ թվով ամերիկահայեր ճիգեր են գործադրում, որ նման նախագծերը հաջողության հասնեն»։
Ինչ վերաբերում է հարցին, արդյոք Ներկայացուցիչների պալատի ու Սենատի որոշումներից հետո հնարավոր է նաև Բայդենի վարչակազմի մոտեցումը փոխվի ու ավելի կոշտ հռետորաբանության ականատես լինենք Վաշինգտոնի կողմից, Հարութ Սասունյանը պատասխանեց․«Այս մասին հաճախ խոսվում է։ Դժբախտաբար հարցն այնքան հեռու չի գնացել, որ ռազմագերիների ազատագրման համար գործնական արդյունք ունենանք։ Սա ամերիկյան Կոնգրեսի կողմից ավելի բարոյական աջակցություն է։ Անշուշտ եթե ամերիկյան կառավարությունը, նախագահն ուզում է, որ շատ ավելի խիստ քայլերի գնան՝ կարող են պատժամիջոցներ կիրառել Ադրբեջանի դեմ, ստիպեն, որ Ադրբեջանն ազատագրի ռազմագերիներին։ Այսինքն՝ մենք դեռ չենք հասել այնտեղ, որ ԱՄՆ-ն հարցով լրջորեն զբաղվի ու խստորեն պահանջի,սպառնա պատժամիջոցներով, որ հայ ռազմագերիներն ազատ արձակվեն»-եզրափակեց նա։
Լուսանկարը՝ panorama.am-ի