ԱԱԾ-ն օրերս հայտնեց պետական դավաճանության դեպքի նախաքննության ավարտի մասին: գործի նյութերով պարզ էր դառնում, որ երկու քաղաքացի, որոնք չեն ունեցել մշտական աշխատանք և կայուն եկամուտ ու աշխատանքի համար մեկնել են Թուրքիա, այնտեղ հավաքագրվել են Ադրբեջանի համար: Հետո սկսել են այստեղից պետական գաղտնիք պարունակող տեղեկություն հայտնել, ինչը էապես վնասել է մեր պաշտպանությանն ու նպաստել թշնամու առաջխաղացմանը:
Այստեղ հետաքրքիրն այն է, թե երկու չաշխատող անձինք ինչպե՞ս են հասանելիություն ունեցել այդպիսի կարևորագույն տեղեկությունների, որ լրջորեն վնասել է Հայաստանի պաշտպանությանը: Արդյոք պատճառը բարձիթողի վիճակը չէ, որը տիրել է մեր անվտանգային համակարգում:
Այս առնչությամբ «Առաջին լրատվական»-ի հետ զրույցում ԱԺ պաշտպանության և անվտանգության հարցերի հանձնաժողովի փորձագետ Արծրուն Հովհաննիսյանը նշեց. «Նույնիսկ ամենաուժեղ հատուկ ծառայություններ ունեցող պետությունների քաղաքացիներից էլ են դավաճաններ դուրս գալիս: Սա մշտական պայքար է, Հայաստանը մշտապես պետք է ձգտի, որ իր քաղաքացիների մեջ չլինեն նման մարդիկ, եղած դեպքում էլ արագ բացահայտի: Թուրքիան ու Ադրբեջանն էլ միշտ ձգտելու են իրենց նպատակին հասնել և այստեղ ոչ մի արտառոց բան չեմ տեսնում մասնագիտական առումով: Իհարկե, մարդկային առումով շատ արտառոց ու աննորմալ է, որ քո հայրենակիցը կարող է գումարի դիմաց քեզ, քո ազգին, քո պետությանը ծախի: Իսկ Թուրքիան ու Ադրբեջանը անգամ առաջին հանրապետության ժամանակ Վրաստանի տարածքում փորձել են հավաքագրել հետախույզների և ինչ-որ խնդիրներ են լուծել»:
Հարցին, թե եթե մեր անվտանգության համակարգը բարձր մակարդակի լիներ, նրանք կկարողանայի՞ն նման գործունեությունը ծավալել, փորձագետը պատասխանեց. «Շատ լավ է, որ մեր հատուկ ծառայությունները նրանց բացահայտել են, որովհետև այդ տիպի դավաճանները շատ լավ քողարկված են, շատ ուժեղ տեխնիկական միջոցներով հագեցած և լավ վարժված են, այնպես չէ, որ հեշտ է նրանց բացահայտելը»:
Ինչ վերաբերում է նրան, թե ինչպե՞ս են կարողացել մարդիկ այդքան ահռելի ինֆորմացիայի տիրապետել՝ չունենալով աշխատանք, Արծրուն Հովհաննիսյանն ասաց. «Մենք անընդհատ կոչ էինք անում հեռախոսներով սա չնկարել, նա չնկարել, ավել պակաս չխոսել սրա, նրա մոտ, չվստահել բարեկամներին, հին ծանոթներին: Բայց դե լինում են նման դեպքեր: Դրա համար մենք պարտավոր ենք լինել ավելի հետևողական, մասնագետներն ավելի զգույշ, ժողովուրդը ավելի փակ բերան:
Տարիներ շարունակ ասել ենք, որ այսրոպեական, մի հատ կարճ ինֆորմացիայի համար, մի հատ լայքի համար մարդիկ կարող են դնել ու նյութեր բացահայտել: Մենք գիտենք, որ էսինչ գյուղում 2016-ին տեղի ունեցած շատ հայտնի դեպք կա. «հայրենիքի փրկությամբ տառապող» ամենահայտնի լրատվամիջոցներից մեկը մեր հակադիվերսիոն գիշերային օպերացիան տապալեց, որովհետև որոշեց, որ իր նյութն ավելի կարևոր է, քան այդ դիվերսիոն խմբին բռնելը: Գրեց՝ այսինչ գյուղում ադրբեջանցի դիվերսանտներ են եղել, բնակիչներն ասում են, պայմանագրայինների ընտանիքի անդամները պատմում են և այլն: Եվ ամբողջ գաղտնիքը բացահայտեցին: Տարիներ շարունակ խնդրում ենք՝ մի արեք այդպես, հատուկ ծառայությունների մշակած օպերացիաները հարվածի տակ մի դրեք»:
