«Առաջին լրատվական»-ի զրուցակիցն է Արցախի խորհրդարանի Պետական-իրավական հարցերի մշտական հանձնաժողովի նախագահ, «Միասնական հայրենիք» խմբակցության անդամ Սևակ Աղաջանյանը։
-Պարոն Աղաջանյան, նոյեմբերի 25-ին Արցախի Ազգային ժողովում միաձայն ընդունվել է նաև «Լեռնային Ղարաբաղի Հանրապետության վարչատարածքային բաժանման մասին» օրենքում փոփոխություններ կատարելու մասին» օրենքի նախագիծը։Նման փոփոխության անհրաժեշտությունն ինչո՞ւ հիմա առաջացավ։
-Վարչատարածքային բաժանման մասին օրենքը գործում է դեռ 1998 թվականից։ Եթե չեմ սխալվում՝ այն ընդունվել էր 1998 թվականի հունիսի 16-ին՝ ելնելով առաջին պատերազմից հետո իրավիճակի փոփոխությունից։ Այսինքն՝ առաջին պատերազմից հետո որոշակի տարածքներ բռնազավթված են մնացել Ադրբեջանի Հանրապետության կողմից։ Այդ օրենքը մինչ այսօր գործում է ու արդեն երկրորդ պատերազմից հետո օրենքում նորից փոփոխություն կատարելու անհրաժեշտություն առաջացավ, քանի որ տարածքների փոփոխություն է եղել։ Այսինքն՝ որոշակի տարածքներ մնացել են Ադրբեջանի Հանրապետության վերահսկողության տակ։ Պարզապես այնտեղ կոնկրետ նշումներ կան արված։ Մեկ աստղանիշով նշված բնակավայրերը սրանք են, երկու աստղանիշով նշվածները՝ սրանք․․ այդպես մինչև հինգը։ Տեղի է ունեցել օրենքի հստակեցում, որպեսզի նշված բնակավայրերի իրավական կարգավիճակը որոշվի, մենք ստիպված պետք է օրենքում փոփոխություն կատարեինք։
-Շուշիի ու Հադրութի մասով ի՞նչ է ենթադրում օրենքի փոփոխությունը։
-Շուշիի ու Հադրութի մասով փոփոխությունների մեջ հստակ նշում կա, եթե չեմ սխալվում ՝պետք է որ երկու աստղանիշով նշվածների մեջ լինի։ Իսկ դա նշանակում է, որ այդ տարածքները բռնազավթված են սեպտեմբերի 27-ին Ադրբեջանի կողմից նախաձեռնած պատերազմի հետևանքով։ Օրենքի մեջ կա նաև երեք աստղանիշով նշում։ Կան բնակավայրեր, որոնց կեսը Ադրբեջանի վերահսկողության տակ է մնացել, իսկ մյուս կեսը՝ մեր վերահսկողության տակ։ Բնակավայրեր կան, որ դեռևս բնակեցված չեն։
-Իսկ մյուս ազատագրված տարածքները՞, որոնք այսօր Ադրբեջանի վերահսկողության տակ են, դրանք և՞ս երկու աստղանիշով են նշված։
–Այո, ինչքան տարածքներ սեպտեմբերի 27-ից հետո մնացել են Ադրբեջանի վերահսկողության տակ, բոլորը նշված են երկու աստղանիշի տակ։ Այսինքն՝ դրանք ժամանակավորապես գտնվում են Ադրբեջանի վերահսկողության տակ։
-Ընդհանուր առմամբ՝ օրենքում փոփոխություններ անելն այս փուլում ի՞նչ կտա Արցախին, ի՞նչ հետևանքներ կունենա։ Թե՞ ընդամենն արվել է փաստի արձանագրման տեսանկյունից։
-Օրենքի փոփոխությունն ըստ էության ոչինչ չի տալու։ Մենք ընդամենը տվյալ տարածքների իրավական կարգավիճակը որոշելու համար ստիպված «Վարչատարածքային բաժանման մասին» օրենքում փոփոխություն ենք կատարում, բայց դա ըստ էության ոչինչ չի տալու։
