ԵԱՀԿ Մինսկի խմբի համանախագահները համատեղ հայտարարություն են տարածել նոյեմբերի 10-ին Փարիզում Հայաստանի և Ադրբեջանի արտգործնախարարների հետ հանդիպման վերաբերյալ: Համանախագահների տարածած հայտարարության մեջ նշվում է, որ նախարարների հետ հանդիպմանը շարունակվել են քննարկումները, որ սկսել էին սեպտեմբերի վերջին Նյու Յորքում ՄԱԿ ԳԱ Ասամբլեայի օրերին: Համանախագահները նշում են, որ քննարկվել են լարվածության նվազմանն ուղղված միջոցառումների և հետագա քայլերի հարցը, ինչպես նաև ռեգիոն համանախագահների այցի առաջարկը: Ուշադրության է արժանի այն, որ համանախագահները համատեղ հայտարարության մեջ նշում են, թե քննարկվել է նաև նոյեմբերի 9-ի եռակողմ հայտարարության կատարման ընթացքը: Այդ հանգամանքը ուշագրավ է այն առումով, որ եռակողմ ձևաչափի օրակարգը փաստորեն գտնվում է նաև համանախագահ եռյակի աշխատանքի օրակարգում, այլ կերպ ասած կա համանախագահների և եռակողմ ձևաչափերի օրակարգի որոշակի ներդաշնակեցում, իհարկե պայմանական, հարաբերական իմաստով:
Համենայնդեպս փաստ է, որ համանախագահներն են նաև այդ հարցը քննարկում կողմերի հետ, այլ ոչ միայն նոյեմբերի 9-ի այսպես ասած միջնորդ Ռուսաստանը: Միաժամանակ, ուշադրության արժանի հանգամանք է և այն, որ համատեղ հայտարարության մեջ խոսվում է մարդասիրական հարցերի լուծման հարցում առաջընթացի հասնելու կարևորության մասին, կոչ անելով կողմերին ապահովել մարդասիրական միջազգային կառույցների անխոչընդոտ մուտքը: Իհարկե այստեղ հարց է առաջանում, թե ինչու են համանախագահները դարձյալ առաջնորդվում հավասարության նշանով, եթե ակնառու է, որ մուտքը խոչընդոտում է Բաքուն: Եվ այդ առումով նաև հարց է առաջանում, թե արդյո՞ք համանախագահների համատեղ հայտարարության մեջ ասվածը նշանակում է, որ Փարիզի հանդիպմանը չի արձանագրվել որևէ առաջընթաց այդ հարցում, այլապես հայտարարության մեջ տեղ չէր գտնի այդ դրույթը: Միաժամանակ հատկանշական է ևս մի հանգամանք: Հայտարարության մեջ ըստ էության գերակշռում է մարդասիրական հարցերի օրակարգը: Սա այն մոտեցումն է, որ Ռուսաստանի հետպատերազմյան դիրքորոշման հիմքում էր: Մոսկվան էր պարբերաբար նշում, որ նախ պետք է լուծել մարդասիրական հարցերը, որից հետո կլինի քաղաքական օրակարգի ավելի նպաստավոր միջավայր: Արդյո՞ք համանախագահ մյուս երկրները ևս հանգել են այդ մոտեցման, և դա կարող է լինել իրավիճակի վերագնահատմա՞ն, թե՞ համանախագահների միջև որևէ լայն պայմանավորվածության արդյունք:
