«Մենք միայն կարող ենք ասել որ երկխոսությունը շարունակվում է»,- այսօր լրագրողների հետ հանդիպման ժամանակ, անդրադառնալով ՀԱԿ-իշխանություն երկխոսության մանրամասներին, կարծիք հայտնեց իշխանական պատվիրակության ՀՀԿ-ական անդամ Գագիկ Մինասյանը: Հարցին, թե ի՞նչ խոստում է տվել իշխանությունը ՀԱԿ-ին, որ վերջինս շարունակի երկխոսությունը, Մինասյանը պատասխանեց, որ որևէ խոստում չեն տվել, քանի որ երկխոսությունը նման բան չի ենթադրում, և դրա նպատակն է քննարկել իրավիճակն ու համատեղ ուժերով գտնել Հայաստանում առկա բազմաթիվ խնդիրների տարբերակները:
Մինասյանը նշեց, որ երեկ կայացած երկխոսության 5-րդ ռաունդի ընթացքում օգոստոսի 9-ի միջադեպի պատճառով ձերբակալաված երիտասարդների ազատ արձակման հարցը չի քննարկվել, քանզի խնդիրը կախված է իրավաբանական ընթացակարգերից, իսկ իրենց քննարկումն իրավաբանական ոլորտում չէ: Նա նկատեց, որ իրենք պարզապես քննարկել են միջադեպը: Հարցին, թե ինչպիսի՞ն է նրա աձնական կարծիքը միջադեպի մասին, Մինասյանը պատասխանեց, որ նման գործերում գնահատական տալը ոչ կառուցողական կլինի:
Պատասխանելով այն հարցին, թե ե՞րբ է իշխանական պատվիրակությունը ներկայացնելու իր պատրաստած 130 էջանոց հակափաստարկները, Մինասյանն ասաց. «Կներկայացնենք այն ժամանակ, երբ այլ գործընթացներ չխանգարեն դրան, քանզի հիմա մենք գտնվում ենք այլ խնդրի ուսումնասիրման շրջանակներում»:
Իշխանական պատվիրակության ներկայացուցիչն անտրամաբանական համարեց կարծիքները, թե ՀԱԿ-ը, երիտասարդների ձերբակալության հետ կապված, դուրս կգա երկխոսությունից, իսկ ՀԱԿ մամուլի խոսնակ Արման Մուսինյանի հայտարարությունը, թե մնացել է 24 ժամ երկխոսության ճակատագիրը որոշելուն, Մինասյանը որակեց որպես «անպատասխանատու հայտարություն»: Նրա կարծիքով՝ անհեթեթություն է ձերբակալված երիտասարդներին քաղբանտարկյալ համարելը:
