Մթերման ընթացքին և վերամշակող ընկերությունների աշխատանքներին տեղում ծանոթանալու նպատակով՝ ՀՀ գյուղատնտեսության նախարար Սերգո Կարապետյանը եղել է Արմավիրի, Էջմիածնի և Մասիսի վերամշակող ձեռնարկություններում: Այս մասին տեղեկացնում է ՀՀ գյուղատնտեսության նախարարության պաշտոնական կայքը:
Այցելությունը սկսվել է Արմավիրի մարզի «Լևոն» ՍՊԸ-ից, որտեղ նախարարը ծանոթացել է «Դալարիկ» ապրանքանիշի արտադրանքին: Նախկին «Սարդարապատ» պահածոների գործարանի հիմքի վրա ստեղծված ձեռնարկությունն այժմ աշխատում է իր հզորության 40%-ի չափով: Ընկերության գործունեությունը խթանելու նպատակով «Գյուղական տարածքների տնտեսական հիմնադրամից» կտրամադրվի 200 մլն դրամ:
«Արարատյան դաշտավայրում` հատկապես Արմավիրի մարզում, վերամշակող ճյուղը մեծ նշանակություն ունի բերքի իրացման հարցում: Կարևորելով դա` մենք հիմնադրամի միջոցով վերականգնում ենք չաշխատող կամ դժվարություններ ունեցող պահածոների գործարանների գործունեությունը», – նշել է նախարարը` մատնանշելով Մեղրիի պահածոների գործարանի արտադրական ծավալների մեծացումը, երկարատև դադարից հետո Տավուշի վերամշակող ձեռնարկության վերագործարկումը: Առաջիկայում կգործի նաև Սյունիքի մարզի Հարջիսի պահածոների գործարանը: Վերագործարկման փուլում է Եղեգնաձորի պահածոների գործարանը:
Նախարարը եղել է նաև Էջմիածնի պահածոների գործարանում և «Ալիշան» ընկերությունում, որտեղ և զրույցի ընթացքում նշել է, որ վերամշակող ճյուղը Հայաստանում առաջատար դիրքերում է, և պետք է հնարավորինս զարգացնել այն, քանի որ լոկոմոտիվի դեր ստանձնելով` վերջինս կարող է իր հետևից տանել նաև այլ ճյուղեր: Սերգո Կարապետյանը կրկին վստահեցրել է, որ գյուղացու աճեցրած բերքն այս տարի ամբողջությամբ կիրացվի: