Բանաստեղծ, «Ցոլքեր» ՀԳՄ պատանեկան-երիտասարդական հանդեսի խմբագիր Հռիփսիմէն հանրության լայն շրջանակին ներկայացրեց «44 օր» փաստագրական վեպը, որը նվիրել է Արցախյան պատերազմի տարելիցին:
Գրքի շնորհանդեսը տեղի ունեցավ նոյեմբերի 1-ին Հայաստանի գրողների միությունում:
Հռիփսիմէի խոսքով՝ զոհված տղաների ծնողներն են իրենց զավակների կենսագրություններն ուղարկել իրեն: «Իհարկե, խմբագրելու, շտկելու կարիք եղել է: Պետք է խոստովանեմ, որ ինձ համար այս գիրքը գրելը բավականին ծանր էր: Կարծում եմ, որ ինձանից հետո շատերը կգրեն, որովհետև, ավաղ, մեր զոհերը շատ են, և Աստված չանի, որ նման գրքեր գրելու առիթ կրկին լինի»,-նշեց նա:
Գրողների միության նախագահ Էդվարդ Միլիտոնյանն ասաց, որ 44-օրյա պատերազմի մասին և՛ ընթացքում, և՛ հետո լրագրողները, գրողները գրել են հոդվածներ, ակնարկներ նաև գեղարվեստական գործեր, որոնք այժմ հրատարակվում են առանձին գրքերով:
«Հռիփսիմէի գիրքը շատ լավ ժողովածու է Արցախյան 44-օրյա պատերազմում 70-ից ավելի զոհվածների մասին: Նրանց կենսագրությունն է. ներառվել են զոհվածների մասին գեղարվեստական խոսքեր, տղաների արտահայտությունները, նրանց ընտանիքների պատմություններն ու հիշողությունները: Զոհված հերոսների շարքում են նաև երիտասարդ գրողներ: Նրանցից մեկը՝ Վարդան Ամալյանը, մինչև 14 տարեկանն է գրել, բայց շատ հետաքրքիր է ստեղծագործել, իսկ Վաչագան Մանուկյանը մինչև պատերազմն իր առաջին գիրքն էր հրատարակել: Նա գրել է. «Եթե չգամ, չլինեմ, թող լույսը միշտ լինի բոլորի հետ, ամենքի հետ» »,-պատմեց Միլիտոնյանն ու հավելեց, որ «44 օր» գիրքն ընթերցելիս պարզ է, որ այն գիտակցված պայքարի մեջ մտած մարդկանց մասին է:
Միջոցառմանը ներկա էին զոհվածների ծնողները, հարազատները, գրողներ, պաշտոնյաներ և այլք:
Պատերազմի մասնակից, Արցախի հերոս Մենուա Հովհաննիսյանի մայրը՝ «Հայ ասպետ» կրթադաստիարակչական բարեգործական հիմնադրամի հիմնադիր-տնօրեն Կարին Տոնոյանը, շեշտեց՝ կցանկանա, որ նման գրքերը բազմացվեն և ուղարկվեն դիրքեր: «Ես հոգուս խաղաղությունը գտնում եմ դիրքերում, որտեղ կանգնում եմ տղաների կողքին և նրանց հետ մեկ օր կամ մի քանի ժամ եմ անցկացնում: Այնտեղ ավելի հեշտ է, քանի որ տեսնում եմ երիտասարդների, որոնց ցանկանում եմ պաշտպանել, անել նրանց համար այն, ինչ չկարողացա անել իմ որդու համար: Ըստ իս՝ ցանկացած զինվոր, որը հիմա դիրքում է, մայրերի համար պետք է նույնքան կարևոր լինի, որքան սեփական զավակը, որովհետև այսօր նրանք շատ անպաշտպան են: Այս գրքերը կարդալը դիրքերում կանգնած տղաներին ուժ կտա, և նրանք կհասկանան, որ այս տղաներն իրենց կյանքն են տվել, որ նրանք կանգնեն ոչ թե կրակի տակ, այլ խաղաղ պայմաններում»,-ընդգծեց Տոնոյանը:
Նա խնդրեց շատ գրել զոհվածների մասին, քանի որ «44 օր» գրքում խոսվում է 72 զոհի մասին, այնինչ նրանք շատ-շատ են:
«44 օր» գիրքը հրատարակվել է «Կարո Հովագիմյան» բարեգործական հիմնադրամի աջակցությամբ: