Նոյեմբերի 9-10-ը սպասվելիք հնարավոր նոր փաստաթղթի ստորագրումը ձախողելու նպատակով Ռոբերտ Քոչարյանի ղեկավարած «Հայաստան» դաշինքը նախատեսում է նույն օրերին հանրահավաք անցկացնել Երևանում։
Հնարավոր նոր փաստաթղթի ստորագրման մասին տեղեկություն մամուլում հայտնվել է «Ալիք Մեդիա» լրատվականի կողմից՝ հղում արված կայքի անանուն աղբյուրներին։ Թե կոնկրետ ինչ փաստաթղթի մասին է խոսքը, ինչ բովանդակություն ունի այն և արդյոք իսկապես նախատեսվում է ստորագրում՝ հանրությանը հայտնի չէ։
Ուշագրավ է, սակայն, որ ցույցի կազմակերպիչներ «Հայաստան» դաշինքի ներկայացուցիչներն այս օրերին հանդիպել են ՀՀ-ում ՌԴ դեսպան Սերգեյ Կոպիրկինի հետ։ Խմբակցության ղեկավար Սեյրան Օհանյանը լրագրողների հետ զրուցում հայտարարել է, որ կան փակ խնդիրներ, որոնք և քննարկվել են հանդիպման ընթացքում։ Բայց ամենաուշագրավն այն է, որ եռակողմ հնարավոր նոր փաստաթղթի կողմերից մեկի՝ Ռուսաստանի դեսպանն ընդդիմադիրներին ասել է, որ նոր փաստաթղթի մասին ինքը տեղեկություն չունի։
ԳԽ պատգամավոր Ազատ Արշակյանի կարծիքով՝ Ռուսաստանի մասին խոսելիս, պետք է հիշենք, որ այդ երկիրը գործընկեր ճանաչում է Նիկոլ Փաշինյանին․«Նախագահի մակարդակով հայտարարվում է, որ իր գործընկերը Նիկոլ Փաշինյանն է, իսկ այլ օղակներում շատ հնարավոր է, որ համագործակցում է նաև այլ ուժերի հետ։ Շատ բնական է, որ դեսպանը հանձնարարություն չունի համագործակցել, աջակցել ընդդիմությանը։ Կամ դեսպանը դա անում է, բայց մամուլում ճշմարտությունը չի հայտարարում»,-«Առաջին լրատվական»-ի հետ զրույցում ասաց նա։
Ըստ Արշակյանի՝ քանի որ մեր ընդդիմությունը հայտարարում է, որ ինքը կողմ է Լենին-Ատաթուրք, Էրդողան-Պուտին պակտին, ենթադրելի է, որ նրանց ևս կան հանձնարարություն տվողիներ․ «Բայց նրանք բարձր մակարդակում չեն, հրապարակում չեն։ Շրջաբերականը գաղտնի է՝ կարդալ, ընդունել ի գիտություն ու թուղթն այրել»։
Ընդդիմությունը դեմ կգնա դեմ մի փաստաթղթի, որի նախաձեռնողներից մեկը Ռուսաստանն է, հարցին ի պատասխան Արշակյանն ասաց․ «Ընդդիմության խնդիրը ստորագրել կամ չստորագրելն չէ, նրանց խնդիրն է ապակայունացնել պետությունը։ Դա կարևոր բան է, նրանք դա են անում։ Նրանց համար կարևոր չէ՝ կա՞ փաստաթուղթ, թե՞ ոչ։ Դա լավ թուղթ է, թե ոչ՝ դա չէ իրենց համար կարևոր, կարևորը իշխանությանը թուլացնելն է, այս դեպքում՝ բանակցությունների սեղանի շուրջ նստած հայկական պետության ղեկավարությանը։ Նրանք հենց այդ խնդիրն են լուծում՝ հասարակության մեջ անվստահություն սերմանել ու թուլացնել իշխանությանը։ Իրենք հենց դա են անում։ Իշխանությունը դա պետք է իմանա ու չթուլանա»։
Քաղաքագետ Ռուբեն Մեհրաբյանի դիտարկմամբ՝քանի դեռ ընդդիմությունն իր մոտեցումը չի արտահայտել, իրենց գործողությունները կարելի է դիտարկել բացառապես մանիպուլյատիվ դաշտում․ «Այստեղ պետականամետ որևէ նշույլ գոյություն չունի այդ բոլոր մարմնաշարժումների մեջ»,-«Առաջին լրատվական»-ի հետ զրույցում ասաց նա։
Մեհրաբյանի խոսքերով՝ միութենական պետության գովք անող ընդդիմությունը որպես ի՞նչ պետք է դեմ գնա Ռուսաստանի հովանավորությամբ ստորագրվելիք հնարավոր փաստաթղթին․ «Սեփական երգը լռեցնելու կամ էքսիստենցիալ հարթության վրա քաղաքական ինքնասպանության ցանկություն այսպես կոչված ընդդիմության մոտ ես չեմ տեսնում ու պատճառ էլ չունեմ տեսնելու»,-եզրափակեց նա։
