Սննդամթերքի գները 2010 թվականի հուլիսի համեմատ աճել են 33%-ով և մոտեցել են 2008 թվականի պիկ-ցուցանիշին. իր հերթական հաշվետվության ժամանակ հայտնել է Համաշխարհային բանկը:
«Սննդամթերքի համաշխարհային գները աճել են 33%-ով և զգալի բարձր մակարդակի վրա մնում են ավելի երկար, քան 2010 թվականի հուլիսին: Սննդամթերքի համաշխարհային պաշարները մնում են ցածր մակարդակի վրա»,- մեջբերում է РИА Новости-ն:
«Սննդամթերքի ներքին գները տատանվում են անկանխատեսելիորեն. որոշ շուկաներում եգիպտացորենի գները անցած տարի աճել են 100%-ով, իսկ այլ շուկաներում` իջել 19%-ով: Հաշվետվության տվյալների համաձայն`անցած տարվա ընթացքում եգիպտացորենի գինը աճել է միջինը 84%-ով, շաքարավազինը` 62%-ով, ցորենինը` 55%-ով, սոյայի ձեթինը` 47%-ով: Դրա հետ մեկտեղ՝ հում նավթի գինն աճել է 45%-ով»,- ասվում է փաստաթղթում:
Համաշխարհային բանկը նշում է, որ աֆրիկյան երկրներում ավելի քան 12 միլիոն մարդ շտապ պարենային օգնության կարիք ունի: Տեղաբնակների սննդի հիմնական բաղադրիչների գները գերազանցում են 2008 թվականի առավելագույն ցուցանիշը:
