Պաշտպանության նախկին նախարար Դավիթ Տոնոյանը, որը կալանավորված է տարիներ առաջ Հայաստանի զինուժին անորակ սպառազինության մատակարարմանն առնչվող քրգործով, իր փաստաբանական խմբի հայտարարության տեսքով արել է թերևս բավականին ուշագրավ ակնարկ: Դավիթ Տոնոյանի փաստաբանները արել են հայտարարություն, որտեղ վերստին նշում են, որ նախխկին նախարարը չի ընդունում վերը նշված քրգործով իրեն ուղղված մեղադրանքը:
Հիշեցնենք, որ քրգործով կալանավորված են մի շարք այլ բարձրաստիճան զինվորականներ, ինչպես նաև Հայաստանի զինուժին սպառազինություն մատակարարած կազմակերպության սեփականատեր Դավիթ Գալստյանը՝ ավելի հայտնի դարձած Պատրոն Դավո անվանումով, որն ըստ մամուլի հրապարակումների ընկերական հարաբերություն ունի նախկին նախարար Տոնոյանի հետ: Քրգործն իհարկե վերաբերում է ոչ թե Դավիթ Տոնոյանի նախարարության շրջանին, այլ ժամանակահատվածին, երբ նա պաշտպանության նախարարի առաջին տեղակալն էր, իսկ նախարարն էր Սեյրան Օհանյանը, որը նաև հարցաքննվել է վերոհիշյալ քրգործով: Այդպիսով, Դավիթ Տոնոյանի փաստաբանները հայտարարել են, որ իրենց պաշտպանյալը չի ընդունում իրեն ուղղված մեղադրանքը և շարունակելու է պայքարել իր անմեղության, ինչպես նաև բարի համբավը պաշտպանելու համար:
Փաստաբանական խմբի հայտարարության մեջ առանձնակի ուշադրություն է գրավում հետևյալ պարբերությունը. «ՀՀ պաշտպանության նախարարի պաշտոնից ազատվելուց հետո պարոն Տոնոյանը ձեռնպահ է մնացել մեկնաբանություններից՝ հաշվի առնելով պետական գաղտնիքը, ՀՀ ազգային անվտանգության և միջպետական հարաբերությունների շահերը: Այսօր ևս պարոն Տոնոյանն այդ շահերը վեր է դասում սեփական շահերից և տիրապետելով տեղեկատվության մեծ ծավալի՝ այն չի օգտագործում հանրային տիրույթում սեփական պաշտպանության համար: Պարոն Տոնոյանը վստահ է, որ հատուկ մասնագիտական գիտելիքներ ունեցող անձանց կողմից կատարված փորձաքննության արդյունքները փաստարկված և անաչառ պատասխաններ կտան ՀՀ զինված ուժերի համար «անորակ» և «տեխնիկական նորմերին չհամապատասխանող» զենք-զինամթերքի մասին պնդումներին»: Դավիթ Տոնոյանի փաստաբանների հայտարարությունն առնվազն առաջացնում է տպավորություն, որ Տոնոյանը զգուշացնոում է որևէ անձի կամ անձանց շրջանակի, որ հանուն իր պաշտպանության կարող է հրապարակել նաև տեղեկություններ, որոնք հանրայնացնելուց առայժմ մնում է ձեռնպահ: Դա նշանակում է, որ կան անձինք, որոնք այսպես ասած փորձում են կամ կարող են թաքնվել Տոնոյանի հետևում, պատասխանատվությունը թողնելով նրանց վրա:
Նախկին նախարարը ակնարկում է թերևս, որ այդ պարագայում՝ եթե որևէ մեկը կամ անձինք փորձենք խուսափել պատասխանատվությունից և այն թողնել իր վրա, կանգ չի առնի նաև այնպիսի տեղեկություն հանրայնացնելու առաջ, որը կարող է պարունակել որոշակի գաղտնիություն: Արդյո՞ք Դավիթ Տոնոյանի փաստաբանների հայտարարության մեջ առկա ակնարկ-զգուշացումը ուղղված է ներկայիս կառավարությանը, թե՞ այն շրջանի իշխանությանը, որի վերաբերում է քրգործը՝ 2011-17 թվականներ: Առայժմ բավականին բարդ է դրա վերաբերյալ եզրակացություն անել, սակայն ակնարկի առումով կարծես թե ամեն ինչ առավել քան պարզ է:
