Թուրքական Radikal թերթի փոխանցմամբ՝ երեկ Ժանդարմերիայի հրամանատարությունը զորավարժություններ է անցկացրել Իզմիրի նահանգի Ֆոչա քաղաքում։
Ժանդարմերիայի հատուկջոկատայինների ուսումնական կենտրոնի հրաձգարանում անցկացված զորավարժությունների ժամանակ ականանետից արձակված արկերից մեկն ընկել է տրիբունայում կանգնած և զորավարժությունների ընթացքին հետևող զինվորականների խմբի մոտ։
Դրա արդյունքում վիրավորվել է 15 զինծառայող, որոնց փոխադրել են Ֆոչայի պետական հիվանդանոց։ Նշվում է, որ նրանց կյանքին վտանգ չի սպառնում։
Հիշեցնենք, որ դեռևս 1839 թվականին Օսմանյան կայսրությունում ստեղծված Ժանդարմերիան ոստիկանական գործառույթներ է իրականացնում այն վայրերում, որտեղ ոստիկանությունը գործունեություն չի ծավալում, սակայն 250.000-անոց անձնակազմ ունեցող Ժանդարմերիան ենթարկվում է զինված ուժերին։
