Ռուսաստանի արտաքին գործերի նախարար Սերգեյ Լավրովը հայտարարել է, որ Իրանի արտգործնախարարի հետ քննարկել է Հայաստանի, Ադրբեջանի ու Վրաստանի մասնակությամբ «3+3» ձևաչափ ստեղծելու գաղափարը.«Մենք այսօր քննարկեցինք « 3+3 » ձևաչափ ստեղծելու նախաձեռնությունը. Երեք անդրկովկասյան երկրներ և նրանց երեք խոշոր հարևանները՝ Ռուսաստանը, Իրանը և Թուրքիան»,-հայտարարելէ Սերգեյ Լավրովը:
Նա նշել է, որ Իրանը, ինչպես նաև Թուրքիան ու Ադրբեջանը դրական վերաբերմուքն ունեն այս նախաձեռնության վերաբերյալ: ՌԴ արտաքին գերատեսչության ղեկավարն առանձին անդրադարձել է նաև Հայաստանին ու Վրաստանին.<<Մենք աշխատում ենք մեր հայ գործընկերների հետ: Նաև հույս ունենք, որ Վրաստանը, չնայած իր առջև ծառացած բոլոր խնդիրներին, կկարողանա տեսնել իր հիմնարար շահը՝ ստեղծել այս տարաշածրջանի զարգացման վերաբերյալ խորհրդակցությունների և որոշումների համաձայնեցման մեխանիզմ, որը կապահովի այս տարածաշրջանի արագացված զարգացումը, որը երկար ժամանակ զսպվում էր՝ գոյություն ունեցող հակամարտությունների պատճառով»:
Վրաստանում, սակայն, այս նախաձեռնության վերաբերյալ թերահավատ են: Վրաց քաղաքագետ Գելա Վասաձեն «Առաջին լրատվական»-ի հետ զրույցում ասաց՝ թե ինչպես կարձագանքի պաշտոնական Թբիլիսին պարզ չէ, սակայն հստակ է մեկ այլ բան. «Մտածել, թե Ռուսաստանը թույլ կտա, որ Իրանը Կովկասում մեծ խաղի մեջ ներգրավվի՝ բավականին միամիտ կլիներ»:
Ինչ վերաբերում է Վրաստանին, Վասաձեի պատասխանը հստակ է. «Կա մեկ շատ մեծ խնդիր. Ռուսաստանը օկուպացրել է Վրաստանի երկու շրջան ու պարոն Լավրովը չէր կարող դա չիմանալ»: