ԱՄՆ Երդվյալ ատենակալների դատարանը Tesla-ին պարտավորեցրել է նախկին սևամորթ աշխատակցին վճարել մոտ 137 միլիոն դոլար՝ աշխատավայրում ռասայական դրդապատճառներով հետապնդումների պատճառով: Այս մասին գրում է Wall Street Journal- ը:
Սևամորթ աշխատակից Օուեն Դիասը 2015 -2016 թվականներին Tesla-ի Կալիֆոռնիայի գործարանում աշխատել է որպես վերելակների օպերատոր: Դիասի փաստաբան Բերնանդ Ալեքսանդրի խոսքերով՝ իր պաշտպանյալը լոգարանում բազմիցս ռասիստական պատկերներ ու մակագրություններ է տեսել, իսկ աշխատակիցները կոչել են նրան ռասիստական մականուններով։
Դատարանի որոշմամբ՝ Tesla- ն ստեղծել է թշնամական աշխատանքային միջավայր Դիասի համար և չի կարողացել ողջամիտ քայլեր ձեռնարկել ռասայական դրդապատճառներով ոտնձգությունները կանխելու համար:
Հրատարակության տվյալներով ՝ դատարանը պարտավորեցրել է ընկերությանը վճարել Դիասին 6,9 մլն դոլարի փոխհատուցում և ևս 130 մլն դոլար տուգանք: «Սա (դատավարությունը – խմբ.) լույս է սփռում այն ամենի վրա, ինչ տեղի է ունենում Tesla-ի գործարանում: Իլո՛ն Մասկ, քեզ զգուշացրել էին՝ կարգի՛ բեր գործարանդ», – մեջբերում է թերթը Դիասի խոսքերը: Tesla-ն հերքել է մեղադրանքները, թե տեղյակ է եղել ենթադրյալ խտրական պահվածքի մասին և որ միջոցներ չի ձեռնարկել սևամորթ աշխատակիցներին պաշտպանելու համար, գրում է թերթը:
Tesla- ի գործադիր տնօրեն Իլոն Մասկը դեռ չի մեկնաբանել դատավճիռը: Հայտնի չէ նաև՝ արդյո՞ք ընկերությունը պատրաստվում է բողոքարկել այս որոշումը:
