Հայաստանում այս տարվա առաջին կիսամյակի տվյալներով արձանագրված ծնելիության 4.4% անկումը, մահվան դեպքերի 3.2% աճը, մինչև 1 տարեկան երեխաների մահացության դեպքերի 1.2% աճը տանում է դեպի դեպոպուլյացիա: «Առաջին լրատվական»-ի հետ զրույցում ժողովրդագիր Ռուբեն Եգանյանը նշեց, որ մեր բնակչության թվաքանակը վաղուց նվազում է՝ ի հաշիվ միգրացիայի, սակայն շատ շուտով լինելու է այնպես, որ մահերի թիվն ավելի շատանա, քան ծնունդների թիվը:
«Դրան քիչ ժամանակ է մնացել՝ առավելագույնը 5-10 տարի, դրանից հետո մահացածների թիվը սկսելու է գերազանցել ծնունդներին: Դա անխուսափելի է»,- ասաց Ռ. Եգանյանը՝ պարզաբանելով, որ ծնող տարիք է մտնում 1990-ական թվականների սերունդը, որն արդեն քիչ է եղել այդ տարիներին՝ ծնելիության նվազման հետևանքով. «Իրենք քիչ են, հետևաբար՝ քիչ են ծնելու»:
Ըստ Ռ. Եգանյանի, մահացությունը շարունակաբար բնակչության ծերացման աճի հետ աճում է, և պետք է աճի: Դրան են բերելու նաև երկրում առկա սոցիալ-տնտեսական պայմանները:
Ընդհանուր բնակչության 0.4% աճը, Ռ. Եգանյանի խոսքով, ընդամենն ընթացիկ հաշվառման գնահատական է. «Միգրացիայի ընթացիկ հաշվառում հնարավոր չի նորմալ կատարել: Մենք միշտ ունենում ենք միգրացիայի թերգրանցումներ, և առայժմ դա պարզապես չի երևում: Այն ավելի ակնառու կլինի առաջիկա մարդահամարի տվյալներով, ինչպես եղավ նախորդ մարդահամարի ժամանակ, երբ 90-ականների միգրացիայի մասին մենք գրեթե պատկերացում չունեինք, համենայնդեպս՝ պաշտոնական թվերով, բայց երբ մարդահամարը եղավ, փաստագրեցինք, թե ինչքան մարդ է 90-ականներին գնացել, դեռ մի քիչ էլ պակաս թվերով: Հիմա նույն ձևով 2011 թ. մարդահամարով կփաստագրենք, թե ինչքան մարդ է գնացել 2000-ական թվերին: Պայմանով՝ եթե մարդահամարն անցկացվի նորմալ, օբյեկտիվ»:
Ռ. Եգանյանը հայտնեց, որ Հայաստանին ավելի ծանր իրավիճակ է սպասվում: Ըստ նրա՝ կան «կանխանկարներ», որոնք ցույց են տալիս, թե ինչ կարող է լինել մեր ժողովրդի հետ առաջիկա 40-50 տարիների ընթացքում:
«Սպասվում են բնակչության թվաքանակի կտրուկ նվազում, սեռատարիքային կազմի ձևախախտումներ, ծերացման գործընթացի էլ ավելի արագացում: Ուղիղ գծով գնում ենք ոչ կենսունակ ժողովրդագրական օրգանիզմ դառնալու ճանապարհով»,- նշեց Ռ. Եգանյանը:
