1996 թվականից մինչև 2018 թվականը Հայաստանում բոլոր ընտրությունների արդյունքները կեղծվել են: Ես դա ասում եմ որպես հանրապետության խորհրդարանի նախագահ: Այս մասին սեպտեմբերի 13-ին ԱԺ նիստին Կենտրոնական ընտրական հանձնաժողովի գործունեության վերաբերյալ զեկույցի քննարկման ժամանակ ասել է խորհրդարանի նախագահ Ալեն Սիմոնյանը՝ ուղիղ կերպով հակասելով ԿԸՀ ղեկավարի հայտարարություններին:
Նրա խոսքով՝ այդ մասին բոլորը գիտեն: «Ասվում էր, որ ընտրությունները կեղծված չեն, բայց հանրությունը շատ լավ գիտեր, որ լավ էլ եղել են: Ուստի բոլոր փորձերն ասելու, որ վերջին ընտրությունները, որոնք տեղի ունեցան Հայաստանում, կեղծվել են, չեն հանդիպում և չեն հանդիպի բնակչության աջակցությանը, քանի որ մարդիկ շատ լավ գիտեն, որ այս ընտրությունները չեն կեղծվել: Քաղաքացիները օրինական կերպով հայտարարեցին իրենց նախընտրությունների մասին»,- ընդգծեց Սիմոնյանը:
Սակայն, ԱԺ նախագահի խոսքով, բացառություններ, այնուամենայնիվ, եղել են: Մասնավորապես, խոսքը 1999 թվականի ընտրությունների մասին է, որոնց մասնակցում էին Հայաստանի այն ժամանակվա պաշտպանության նախարար, «Ղարաբաղի հերոս» Վազգեն Սարգսյանը, ինչպես նաև խորհրդային ու հայկական կուսակցական ու պետական գործիչ, «Միասնություն» դաշինքի ղեկավար Կարեն Դեմիրճյանը:
Քաղտեխնոլոգ Արմեն Բադալյանը կարծում է, որ Ալեն Սիմոնյանը սխալ է ներկայացնում իրողությունը՝ ընտրությունները կեղծվել են 1995 թվականից սկսած․«1995 թվականին տեղի ունեցած առաջին Ազգային ժողովի ընտրությունները։ 1990 թվականին Գերագույն խորհրդի ընտրություններ անցկացվեցին, 1995 թվականի մայիսին՝ ԱԺ ընտրություններ, որոնք կեղծվեցին, նույն թվականի հուլիսի հինգին տեղի ունեցավ սահմանադրական հանրաքվե, որը կեղծվեց․․․ ու այդպես շարունակվեց մինչև 2018 թվականի դեկտեմբեր։ Վերջին կեղծվածը 2017 թվականի խորհրդարանական ընտրություններն էին, որը կեղծիք էլ չէր, ընդամենը ֆինանսական միջոցառում էր»,-«Առաջին լրատվական»-ի հետ զրույցում ասաց նա։
Ինչ վերաբերում է 1999 թվականի ընտրություններին, երբ Վազգեն Սարգսյանի ու Կարեն Դեմիրճյանի գլխավորությամբ հաղթեց «Միասնություն» դաշինքը, ապա ըստ Բադալյանի՝ չենք կարող ասել, որ բացարձակ չի կեղծվել, բայց եղածների մեջ համեմատաբար ավելի մաքուր ընտրություններ էին․«Այնպիսի իրավիճակ էր ստեղծվել, որ իրականում շատ մեծ պահանջարկ կար Վազգեն Սարգսյանին ու Կարեն Դեմիրճյանին բերել իշխանության։ Երկուսն էլ հզոր խթանիչ ուժ հանդիսացան, որ ընտրությունները չկեղծվեն։ Կարող ենք ասել, որ դրանք ամենաքիչ կեղծված ընտրություններն էին։ Մարդիկ մեծ վարկանիշ ունեին, գուցե ինչ-որ բաներ եղել են, բայց ամենաազնիվը դրանք էին»։
Խոսելով կեղծիքների մասին, Բադալյանն ասաց՝ սկզբում դիտորդներին ու հանձնաժողովի անդամներին ծեծում էին, հետո ծեծը փոխարինվեց ընտրակաշառքով։
Միևնույն ժամանակ Արմեն Բադալյանը նշում է, որ իշխանությունը չպետք է հպարտանա, որ իր օրոք ընտրությունները չեն կեղծվում․«Այդպես էլ պետք է լիներ, դա բնական է։ Նույնն է, որ հպարտանաս, երբ տուն գնալիս ոչ ոքի վրաերթի չես ենթարկել։ Դա հպարտանալու՞ բան է։ Դու պարտավոր ես ազնիվ ու թափանցիկ ընտրություններ անցկացնել, անկախ դատաիրավական համակարգ ստեղծել։ Դու ստացել ես վստահության քվե ու պետք է այդ ամենն անես, ոչ ոքի լավություն չես անում»,-եզրափակեց մեր զրուցակիցը։
Քաղաքագետ Ռոբերտ Ղևոնդյանը կիսում է Ալեն Սիմոնյանի գնահատականները և նշում, որ նա նորություն չի ասել․ «Հայաստանում բնակվող ցանկացած գիտակից մարդ ընդունում է, որ այդ ընթացքում ընտրությունները կեղծվել են։ Ես կարող եմ հարցնել՝ ինչո՞ւ 1999-ի ընտրությունները արդեն երկու անգամ Հայաստանում անցկացվող ընտրությունները չեն կեղծվում, որովհետև ժողովրդի կամքի արտահայտումը տեղ է գտնում իշխանության մարմինների ձևավորման գործընթացում ու ստացած պատկերը համապատասխանում է այն քաղաքական դաշտին, որ կա»,-«Առաջին լրատվական»-ի հետ զրույցում ասաց նա։
Շարունակելով Ղևոնդյանը նշեց՝ 1999 թվականին Վազգեն Սարգսյանն ու կարեն Դեմիրճյանը մեծ հեղինակությունն ունեին, ժողովրդի կողմից տրված քվեն համապատասխանեց այդ պատկերին․ «Նույն կերպ էլ 2018, 2021 թվականներին՝ ժողովրդի կողմից տրված քվեն համապատասխանում է առկա պատկերին։ Իսկ մնացած բոլոր դեպքերում կարող ենք արձանագրել, որ այն իշխանությունը որը ցանկանում էր ստանալ որոշակի քվե ու գալ իշխանության՝ առանց կեղծիքների չէր կարող ստանալ ու մենք գիտենք, թե ինչպես էին այդ ընտրությունները կեղծվում»,-եզրափակեց նա։
Լուսանկարը՝ panorama.am-ի
