ԱԺ պետաիրավական հարցերի մշտական հանձնաժողովի նախագահ Դավիթ Հարությունյանը մամուլի ասուլիսի ժամանակ տեղեկացրեց, որ Եվրոպայի խորհրդի խորհրդարանական վեհաժողովը քննարկման օրակարգ է մտցրել և փորձում է սահմանել, թե ով կարող է համարվել քաղբանտարկյալ: Ըստ Դավիթ Հարությունյանի` «քաղբանտարկյալ» տերմինի միջոցով մի երկիր փորձում է ճնշում գործադրել մեկ այլ երկրի վրա: Միաժամանակ նա հայտարարեց, որ Հայաստանը պետք է հասնի ժողովրդավարության այն մակարդակին, որ մեր երկրում մոնիտորինգ անցկացնելու կարիք չլինի: Դավիթ Հարությունյանին «Առաջին լրատվականը» հիշեցրեց, որ, 2004 թ., երբ ինքը արդարադատության նախարար էր ԱՆ դատական ակտերի հարկադիր կատարման ծառայությունը, շրջանցելով առաջին ատյանի դատարանի կայացրած որոշումը, Երևանի Լալայանց փողոցից վտարել է քաղաքացի Մարիամ Գիշյանին իր ընտանիքի հետ: Վերջինս էլ գրեթե երկու շաբաթ առաջ մեկնել է Թուրքիա` այնտեղի իշխանություններից ապաստան ստանալու ակնկալիքով: «Դավիթ Հարությունյանը իրեն մեղավոր չի՞ համարում այդ ամենի համար»,- հարցրինք նրան: «Եթե ԴԱՀԿ-ն ապօրինություն գործած լիներ, վստահ եմ, որ այդ քաղաքացին կդիմեր դատարան, և ԴԱՀԿ գործողությունները կճանաչվեին ապօրինի: Կոնկրետ դեպքի մասին ոչինչ ասել չեմ կարող, որովհետև չունեմ տեղեկություններ»-ասաց ԱԺ պետաիրավական հարցերի մշտական հանձնաժողովի նախագահը: Դավիթ Հարությունյանի ուշադրությունը հրավիրեցինք այն փաստի վրա, որ մեր քաղաքացիներից շատերը չունեն իրավական համապատասխան գիտելիքներ, և միշտ չէ, որ կարողանում են փաստաբանի օգնությամբ մինչև վերջ հետամուտ լինել իրենց շահերը պաշտպանելուն: «Կներեք, չեմ հավատում»,- եղավ արձագանքը: