Cosmopolitan-ը ներկայում հայաստանյան ամսագրային շուկայում ներկայացված միջազգային միակ բրենդն է: Ամսագրի առաջին համարը լույս է տեսել այս տարվա մարտին: Այս մասին «Առաջին լրատվականի» հետ զրույցում տեղեկացրեց Cosmopolitan Հայաստան ամսագրի գլխավոր խմբագիր Հրաչուհի Ութմազյանը:
«Ամբողջ աշխարհում այն թիվ մեկ ամսագիրն է երիտասարդ կանանց համար: Ամսագրի նպատակը երիտասարդ կանանց շրջանում սեփական ինքնագնահատականի բարձրացումն է»,- ասաց Հ. Ութմազյանը՝ ավելացնելով, որ այս ամսագրում կանայք կարող են գտնել իրենց հուզող բոլոր հարցերի պատասխանները:
Ինչ վերաբերում է ամսագրի լսարանի տարիքային շրջանակին, ապա Հ. Ութմազյանը նշեց, որ ներկայում հայաստանյան ամսագրային շուկայում, ի տարբերություն հեռուստատեսության, ցավոք, չկան վարկանշային աղյուսակներ, որոնք որոշեին այս կամ այն ամսագրի վարկանիշը: «Այդուհանդերձ, կարծում ենք, որ աղջիկների ու կանանց տարիքը տատանվում է 18-30-ի սահմաններում»,- հավելեց նա:
«Cosmopolitan-ը ընկերուհի է, ընթերցողի լավագույն ընկերուհին, որը մասնագետների լեզվով միաժամանակ տալիս է կոմպետենտ խորհուրդներ»,- ասաց Հ. Ութմազյանը՝ հավելելով, որ թե՛ Cosmopolitan Հայաստանի, թե՛ Cosmopolitan Ամերիկայի, թե՛ Cosmopolitan Ռուսաստանի համար չափանիշները նույնն են, սակայն Cosmopolitan Հայաստանն ունի մեկ խորագիր, որը չունեն Cosmopolitan-ի միջազգային այլ հրատարակությունները:
«Դա Cosmo-Յանն է, որտեղ ներկայացվում են արտերկրում բնակվող մեր հայրենակիցների հաջողությունների պատմությունները: Ստեղծվում է մի տեսակ Cosmo-հայ համայնք»,- նշեց Cosmopolitan Հայաստանի գլխավոր խմբագիրը՝ հույս հայտնելով, որ գուցե հայերի հաջողություններն օրինակ ծառայեն մյուս հայերի համար:
Ամսագրում, ըստ Ութմազյանի, աշխատում են հոգեբաններ, բժիշկներ, աշխատում են գեղեցկության, նորաձևության մասնագետներ, որոնք կոմպետենտ խորհուրդներ են տալիս:
