Թումոյում արդեն նախնական գրանցվել է շուրջ 400 պատանի: «Առաջին լրատվական»-ը զրուցեց գրանցված պատանիներից ոմանց հետ՝ պարզելու, թե նրանց առավել շատ ինչն է հետաքրքրում, և թե ինչ ակնկալիքներ ունեն: Հիշեցնենք, որ Թումոյում սովորել կարող են 12-18 տարեկան պատանիները:
12 տարեկան Վահանը ցանկանում է մուլտեր կամ խաղեր ստեղծելու ծրագրեր սովորել: Նա սիրում է համակարգչով զբաղվել և կարծում է, որ ապագայում կրթության համար պետք կգա, դեռ հաստատ չի որոշել, թե ինչ մասնագիտություն է ընտրելու: Գուցե՝ դիվանագետ:
«Այս դարում համակարգչային գիտելիքները շատ կարևոր են, և առանց դրանց հնարավոր չէ: Հուսով եմ՝ սովորել համակարգչին լավ տիրապետել, իմանալ շատ ծրագրեր, ինչը հետագայում շատ պետք կգա: Թումոն ինձ կօգնի որոշել իմ մասնագիտությունը»,- ասաց 15-ամյա Իրինան:
14 տարեկան Տիգրանը մտադիր է ուսումնասիրել անիմացիա և կայքերի ստեղծում: Նրա խոսքով, Թումոն իր համար նոր ճանապարհ կբացի դեպի ապագա. «Եթե տեսնեմ շատ լավ է, կշարունակեմ մասնագիտանալ այս ուղղությամբ»:
18 տարեկան Անահիտին հետաքրքրում էր ռեժիսուրան, չնայած արդեն իրավաբանի մասնագիտություն է ընտրել. «Կինոն երազանքս է»:
18-ամյա Սաթենիկի համար Թումոյում կրթությունն ավելի շատ հոբի է. «Ես շատ եմ սիրում նկարել, սա էլ լավ առիթ է: Անիմացիա եմ ուզում սովորել՝ և՛ գրավիչ աշխատանք է, և՛ հաճելի»:
Պատանիներից շատերը նախապես տեղյակ չէին 10 հզ. դրամ դեպոզիտի մասին (գումարը վճարում են պայմանագիր կնքելու ժամանակ, իսկ ուսման ավարտին այն վերադարձվում է), և ոմանց մոտ դա երկմտություն էր առաջացնում:
Մեզ հետ զրույցում Թումո կենտրոնի մամլո պատասխանատու Սեդա Պապոյանը հայտնեց, որ դեպոզիտի իմաստը երեխաներին որոշակի պատասխանատվության զգացում հաղորդելն է, որ պատանին պարտավորվի կանոնները պահել, գույքը չվնասի և այլն:
