Ռուսական Интерфакс լրատվական գործակալության փոխանցմամբ՝ Բելառուսի, Ուզբեկստանի և Ուկրաինայի նախագահները դեռևս չեն հաստատել սեպտեմբերին Տաջիկստանի մայրաքաղաք Դուշանբեում տեղի ունենալիք ԱՊՀ անդամ երկրների հոբելյանական գագաթնաժողովին իրենց մասնակցությունը։ Այս մասին հայտարարել է Տաջիկստանի ԱԳՆ-ի պաշտոնական ներկայացուցիչ Դավլատալի Նազիրևը։
Վերջինիս խոսքերով՝ մնացած 7 նախագահները տվել են մասնակցության վերաբերյալ իրենց համաձայնությունը. «Ռուսաստանի, Հայաստանի, Ղազախստանի, Ղրղզստանի, Մոլդովայի, Ադրբեջանի ու Թուրքմենստանի նախագահների՝ Դուշանբե ժամանելն արդեն իսկ հաստատվել է տվյալ երկրների համապատասխան կառույցների կողմից։
Մենք վստահ ենք, որ ԱՊՀ անդամ մնացած երկրների՝ Ուզբեկստանի, Ուկրաինայի ու Բելառուսի նախագահները նույնպես կմասնակցեն Տաջիկստանի մայրաքաղաքում տեղի ունենալիք գագաթնաժողովին։
Այն տեղի է ունենալու սեպտեմբերին, սակայն կոնկրետ ժամկետը դեռ հստակեցված չէ։ Ներկայումս ակտիվորեն ընթանում են դրա նախապատրաստման աշխատանքները»։
Հիշեցնենք, որ ԱՊՀ-ն հիմնադրվել է 1991 թվականի դեկտեմբերի 8-ին։ Սկզբնական շրջանում այն ուներ 12 անդամ (հետխորհրդային բոլոր հանրապետությունները՝ բացառությամբ մերձբալթյան երկրների)։
2008 թվականի ռուս-վրացական հնգօրյա (օգոստոսի 7-12) պատերազմի ավարտի օրը՝ օգոստոսի 12-ին, Վրաստանի նախագահ Միխեիլ Սաակաշվիլին ցանկություն հայտնեց ԱՊՀ կազմից Վրաստանի դուրս գալու մասին։ Արդեն երկու օր անց՝ օգոստոսի 14-ին, Վրաստանի խորհրդարանը միաձայն (117 կողմ) ընդունեց ԱՊՀ կազմից Վրաստանի դուրս գալու մասին որոշումը։
Սակայն Վրաստանը պաշտոնապես ԱՊՀ-ն լքեց 2009 թվականի օգոստոսի 18-ին։ Դրա արդյունքում ներկայումս 273 միլիոն բնակչություն ունեցող ԱՊՀ-ն ունի 11 անդամ։
