Հայաստանի Ազգային ժողովն այսօր ԱԺ մշտական հանձնաժողովների նախագահներ է ընտրում և մենք տեսնում ենք, որ օրինակ, առանցքային հանձնաժողովներից մեկը՝ Տնտեսական հարցերի հանձնաժողովի նախագահը ընդդիմությունից Վահե Հակոբյանն է լինելու, որը անցնում է տարբեր քրեական գործերով:
Քրիստոնեա-Ժողովրդավարական կուսակցության նախագահ, քաղաքագետ Լևոն Շիրինյանը «Առաջին լրատվական»-ի հետ զրույցում նշեց, որ դա մեծ խնդիր է երկրի համար. «Մեր երկիրը ունի անհրաժեշտություն հենց տնտեսական քաղաքականությունը փոխելու: Իրենց պրոբլեմները տնտեսության ավերի հետ է կապված: Հիմա այս պայմաններում այդ հանձնաժողովը տալիս են նրանց, որ ի՞նչ լինի»,-ասաց Շիրինյանը:
Նրա խոսքով, այս դեպքում երկիրը չի ունենա տնտեսական քաղաքականություն, կունենա այն, ինչ եղել է նախկինում. «Կամ էկոնոմիկայի նախարարը ո՞նց է աշխատելու իրենց հետ: Իշխող ուժը ո՞նց կարող է տնտեսական քաղաքականությունն ուրիշին տալ»:
Հարցին,՝ իր կարծիքով ինչու արտաքին հարաբերությունների հանձնաժողովն ընդդիմության հետաքրքրությունների տիրույթում չէր, իսկ ահա տնտեսական հարցերին իրենց տիրույթում է. Լևոն Շիրինյանը պատասխանեց. «Որովհետև իրենք հաշվում են, որ արտաքին ոլորտում Հայաստանում ինչ էլ լինի-չլինի, Ռուսաստանի խաթրին կպնող չի լինի, բայց սխալվում են: Այսպես իրենք ապահով են զգում: Իսկ տնտեսական ոլորտն իրենց անհատապես շատ է հետաքրքրում»:
Դիտարկմանը, որ գործող իշխանությունն էլ Ռուսաստանին ուղղված ոչ մի թթու խոսք չի ասում, նա ասաց. «Հայաստանն քաղաքական կուրսի ճշգրտման հարց ունի: Իրենք մտածում են հին ավանդույթով՝ «Ուր պետք է փախչեն հայերը, դրա համար բերեք հուպ տանք»: Իրենք հին, ավանդական, բոլշևիկյան բանաձևի մեջ են և այդտեղ խնդիր չեն տեսնում»:
Լևոն Շիրինյանի ներկայացմամբ, եթե տնտեսական հանձնաժողովը տալիս են ռևանշիստներին, երկրում տնտեսական ռեֆորմների մասին պետք է մոռանալ. «Ռեֆորմ չի լինելու, լինելու է մասկիրովկա: Ռևանշիստ ուժերը վերցնում են նաև մարդու իրավունքների պաշտպանության հացերի հանձնաժողովը, սա նշանակում է, որ իրենք շրջանաձև պաշտպանություն են կազմակերպել: Այսինքն մարդու իրավունքների պաշտպանության հանձնաժողովի միջոցով պետք է քաղաքական դարձնեն բոլորին, որոնք պատասխանատվության են ենթարկվում: Դրանով իրենք հեղափոխության արդյունքը աստիճանաբար զրոյացնում են»,-ասաց նա:
Ինչ վերաբերում է նրան, որ այսօր խորհրդարանում ընդդիմության թիրախում էր ԱԺ պաշտպանության, ազգային անվտանգության հարցերի հանձնաժողովի նախագահի թեկնածու Անդրանիկ Քոչարյանը, Լևոն Շիրինյանը նկատեց. «Ես որքան հիշում եմ Անդրանիկ Քոչարյանին, նա եղել է հիմնական քաշող ուժը երկրի վերափոխումների և նաև իրենց քննադատողը, հետևաբար Անդրանիկ Քոչարյանն իրենց հեչ ձեռնտու չէ ռևանշիստներին: Դրա համար ՔՊ-ն պետք է առաջին հերթին անցկացնի Անդրանիկ Քոչարյանին: Ես տեսա, որ Անդրանիկ Քոչարյանի վրա գրոհ էին կազմակերպել: Դա նշանակում է, որ նա պետության համար խիստ անհրաժեշտ է: Իսկ պետաիրավական հանձնաժողովի նախագահի թեկնածուից ես ոչինչ չհասկացա, թե ինչ է ուզում ասել: Միայն հին սովետական ավանդույթով ասում էր՝ այդ հարցերը չի կարելի բարձրացնել: Հենց Վլադիր Վարդանյանն է արմատական քաղաքական համակարգի վերափոխումների իբրև թե ուղղությունը պահողը»:
Լուսանկարը՝ panorama.am-ի
