ԱՄՆ պետքարտուղարությունը համակարգված կերպով նախազգուշացնում է իր քաղաքացիներին այս կամ այն երկիր մեկնելու հետ կապված ռիսկերի մասին, և զարմանալի չէ, որ Covid-19-ի ֆոնին նման նախազգուշացում է տրվում Վրաստանի կապակցությամբ,- այս մասին նշված է Վրաստանի ԱԳ նախարարության մամուլի և տեղեկատվության վարչության մեկնաբանության մեջ:
«ԱՄՆ պետքարտուղարության՝ Վրաստան մեկնելու կապակցությամբ հանձնարարականը, ըստ որի՝ Վրաստան մեկնելը ցանկալի չէ, իրականում նորություն չէ և կապված է կովիդ վարակի տարածման հետ: Covid-19-ի ֆոնի վրա Վրաստանին շնորհվել է չորրորդ մակարդակ, որով ԱՄՆ-ն խորհուրդ է տալիս իր քաղաքացիներին զերծ մնալ Վրաստան մեկնելուց:
Հարկ է նշել, որ այս կոնկրետ հանձնարարականը տեղադրված է պետքարտուղարության կայքում հունիսի 16-ի դրությամբ և այդ ժամանակվանից Վրաստանի կարգավիճակը չի փոխվել: Պետք է հստակ նշել, որ այս նախազգուշացումը կապված է Covid-19-ի հետ, որը հստակորեն բացատրվում է պետքարտուղարության կայքում: ԱՄՆ պետքարտուղարությունը համակարգված կերպով նախազգուշացնում է իր քաղաքացիներին այս կամ այն երկիր մեկնելու վտանգների մասին, և զարմանալի չէ, որ նման նախազգուշացում է տրվում Վրաստանի կապակցությամբ»,- ասվում է Վրաստանի ԱԳ նախարարության մամուլի և տեղեկատվության վարչության հայտարարության մեջ:
Ինչպես նշում են ԱԳ նախարարությունում՝ պետքարտուղարության կայքում նաև հստակ նշված է, որ ԱՄՆ քաղաքացիները պետք է ձեռնպահ մնան Աբխազիայի և Հարավային Օսիայի օկուպացված շրջաններ մեկնելուց՝ այդ տարածքներում հանցագործության, քաղաքացիական անկարգությունների և ականների հետ կապված ռիսկերի պատճառով:
«Պետք է նշել, որ Վրաստանը միակ երկիրը չէ, որտեղ պետքարտուղարությունը ճանապարհորդության հարցերով նման առաջարկություն է ուղղում իր քաղաքացիներին: Դուք կհանդիպեք նմանատիպ առաջարկությունների, այդ թվում ՝ եվրոպական երկրների մասով»,- ասվում է Վրաստանի ԱԳՆ մեկնաբանության մեջ:
