«Առաջին լրատվական»-ի զրուցակիցն է Հայաստանի քրիստոնեա-դեմոկրատական կուսակցության ղեկավար, քաղաքագետ Լևոն Շիրինյանը
-Պարոն Շիրինյան, «Պատիվ ունեմ» դաշինքը հայտարարում է, որ չի խորշելու փողոցային պայքարից և չի դառնալու փողկապավոր խորհրդարանական ընդդիմություն։ Արդյոք հնարավո՞ր է միաժամանակ խորհրդարանում և դրսում պայքար ծավալել։
-Պետք է հասկանալ, որ իրենց նպատակն իշխանափոխության հասնելն է, իսկ դա նշանակում է, որ նրանք կիրառելու են բոլոր միջոցները, ոչ մի բանի առաջ կանգ չեն առնելու։ Ավելին՝ նրանք ոչ միայն փողոցային պայքարից չեն խորշի, կարող են և տեռոր անել խորհրդարանում։ Իշխանափոխությունը հենց դա է, եթե երկրում կա լեգիտիմ իշխանություն, որը 3-4 տարիների ընթացքում բավականին հասունացել է, ունի միջազգային ճանաչում, այդ իշխանությանն իրենք ինչպե՞ս են փոխում, մանավանդ իրենց հանդեպ կա հստակ բացասական վերաբերմունք։ Գումարներով դատական գործընթացներից դուրս գալ, դառնալ խորհրդարանական, չի նշանակում լինել կարևոր գործոն։ Նայեք ովքեր են «Պատիվ ունեմ»-ի մեջ, սպանե՞ր չէին, որոնք ցույցեր էին անում։ Փողը տվել են, անցել են, իսկ ի՞նչ միջոցներ են կիրառվել, որ չտային։ Բազմիցս ասել եմ, որ թող լավ վերահսկեին, նրանք չէին անցնի խորհրդարան։
-Կարծում եք՝ հեղաշրջման վտա՞նգ կարող է առաջանալ։
-Կարող է, իշխանափոխությանը ոչինչ չի խանգարում, մանավանդ եթե իշխանությունը օրինական է և ժողովրդի քվեով ձևավորված իշխանություն է։ Ի վերջո խորհրդարան անցած ընդդիմադիրներն ընտրություններին ցանկալի արդյունք չեն ստացել, և հիմա փոխանակ ծրագրերից խոսեն, իշխանափոխությունից են խոսում։ Խորհրդարանում թող դնեն քննարկեն այլընտրանքային ծրագրեր, բայց իրենց խոսացածը միայն իշխանափոխությունն է, ինչը ենթադրում է, որ պետք է սպասենք անակնկալների, և նրանք, որոնք անցկացրին նրանց խորհրդարան, պատասխանատու են։ Աշխարհի ո՞ր երկրում կարող եք տեսնել, որ Ազգային անվտանգության ծառայության ողնաշարը կազմած մարդիկ ցույց անեն, որ խորհրդարան մտնեն։ Դրանց շեֆը չէր ասո՞ւմ՝ Крым наш, ինչ են наш-ի տակ հասկանում նրանք, հիմա մետրոպոլիայից կտրվա՞ծ են իրենք, թե ոչ։
Այս անգամ մենք ընտրություններին պատնեշ ստեղծեցինք ուժերի գերագույն լարումով և չթողեցինք, որ նրանք մեծամասնություն կազմեն։
-Օգոստոսի երկուսին կլինի ԱԺ առաջին նիստը։ Ի՞նչ սպասել։
-Սպասել վատ անակնկալների։ Լենինյան տակտիկա է, բոլոր լծակները և հարթակները օգտագործել իշխանության զավթման համար։
-Իշխանազավթում կհաջողվի՞։ Ընտրությունները արդյոք ցույց չտվեցին, որ չունեն նրանք հանրային աջակցություն։
-Ժամանակը ցույց կտա, նրանք միջազգային կապեր ունեն, և այդ կապերը որևէ ձևով հնարավոր չէ կտրած լինեն, երկրորդ՝ դա բացառապես կախված է իշխանության՝ արմատական ռեֆորմներ անելու գործընթացներից։ Եվ նաև կախված է նրանից, թե իշխանությունը որքանո՞վ կաշխատի արտախորհրդարանական խորհրդակցական ժողովի հետ և նրանց հետ, որոնց համար հայրենիքի անվտանգությունը, անկախությունը վիճարկման ենթակա չէ։ Եվ կարծում եմ՝ արտախորհրդարանական ուժերի հետ աշխատելու մոդելը լավ է ընտրված, բայց իրենք նախ պետք է արմատական ռեֆորմներ իրականացնեն, առաջին հերթին հանցագործությունների մեջ մեղադրվողները պետք է պատժվեն օրենքի ողջ խստությամբ։ Եվ երկրորդ՝ դատարանները նույն խայտառակ գործելաոճով շարունակում են, և այստեղ նույնպես ռեֆորմներ պետք է իրականացնել։ Ժողովուրդը որքանով տեսնի խոստումների կատարումը, այնքանով կլինի իշխանության կողքին, իսկ այլ պարագայում կարող է չլինել նրա կողքին։