ԱՄՆ-ն պատրաստ է վերադառնալ Իրանի հետ միջուկային գործարքի շուրջ բանակցություններին, սակայն նման առաջարկները հավերժական չեն լինի։ Այս մասին հուլիսի 29-ին ճեպազրույցի ժամանակ հայտարարել է Սպիտակ տան մամուլի քարտուղարի տեղակալ Կարին Ժան Պիերը։
«Մենք կրկին ցույց տվեցինք, որ պատրաստ ենք առաջ շարժվել Իրանի հետ փոխադարձ վերադարձի հարցով՝ իրանական միջուկային ծրագրի վերաբերյալ Գործողությունների համատեղ համապարփակ ծրագրի կատարմանը, երբ Իրանը նախագահական ընտրություններից հետո կավարտի անցումային գործընթացը։ Մենք պատրաստ ենք վերադառնալ Վիեննա՝ բանակցությունները շարունակելու համար», — հայտարարել է Ժան Պիերը։
Նախօրեին Վիեննայում միջազգային կազմակերպություններին առընթեր Իսլամական Հանրապետության մշտական ներկայացուցիչ Քազեմ Գարիբ Աբադին հայտարարել էր , որ Միացյալ Նահանգները հրաժարվում է չեղարկել ավելի վաղ Իրանի 500 ֆիզիկական և իրավաբանական անձանց նկատմամբ ընդունված պատժամիջոցները:
Հուլիսի 14-ին Սպիտակ տան մամուլի քարտուղար Ջեն Փսակին հայտնել էր, որ ԱՄՆ-ն կշարունակի ԳՀՀԾ-ի (Գործողությունների համատեղ համապարփակ ծրագրի) շուրջ բանակցությունները, չնայած ամերիկացի լրագրողին առևանգելու փորձերի վերաբերյալ իրանական հատուկ ծառայությունների հասցեին հնչող մեղադրանքներին, որը քննադատել էր իրանական ռեժիմը: Ինչպես հայտարարել է Պետդեպարտամենտի մամուլի ծառայության ղեկավար Նեդ Փրայսը, Միացյալ Նահանգների վերադարձը Իրանի միջուկային ծրագրի շուրջ ԳՀՀԾ-ին կօգնի արձագանքել Թեհրանի մարտահրավերներին:
Մինչ այդ, հունիսին Իրանի ԱԳՆ ներկայացուցիչ Սայիդ Խաթիբզադեն նշել էր, որ արևմտյան երկրները ստիպված կլինեն սկզբունքային որոշումներ կայացնել, որպեսզի բոլոր կողմերը վերադառնան իրանական միջուկային գործարքի կատարմանը:
Վիեննայում ապրիլից առերեսվում են Իրանի և միջազգային «հնգյակի» (Ռուսաստան, Մեծ Բրիտանիա, Չինաստան, Ֆրանսիա և Գերմանիա) հետ՝ Իրանի միջուկային համաձայնագրի սկզբնական տեսքով վերականգնման նպատակով․ Իրանի դեմ ԱՄՆ-ի պատժամիջոցների վերացման, Իրանի միջուկային պարտավորությունների կատարման, ԱՄՆ-ի ՝ գործարքին վերադառնալու նպատակով: