Էկվադորի վարչական դատարանն անցած շաբաթ անվավեր է ճանաչել այդ երկրի քաղաքացիությունը, որը տրվել է WikiLeaks կայքի հիմնադիր Ջուլիան Ասանժին։ Լրագրողի պաշտպանական թիմը պաշտոնապես ծանուցվել է այդ մասին հուլիսի 26-ին։ Այս մասին հայտնում է РИА Новости-ն՝ հղում անելով Ասանժի փաստաբան Կառլոս Պովեդային։ Նրա խոսքով՝ Վարչական դատարանը համաձայնել է ԱԳՆ փաստարկների հետ՝ քաղաքացիությունն անվավեր ճանաչելու վերաբերյալ։
Որոշումը ենթակա է բողոքարկման։
Դատարանի որոշումը հիմնված է Ֆինանսական ազգային վերահսկիչ վարչության հաշվետվության վրա, որում խոսվում է քաղաքացիության տրամադրման ընթացակարգում տեղ գտած խախտումների մասին։
Փաստաբանի հավաստմամբ՝ վարչության գործողություններում ակնհայտորեն հետապնդվում են քաղաքական շահեր, քանի որ մեղադրող կողմն այդպես էլ չի կարողացել հաստատել խախտումներից որևէ մեկը և ապացույց տրամադրել։
Հպատակագրման (նատուրալիզացիա) մասին նամակն Ասանժն Էկվադորի կառավարությունից ստացել է 2017 թվականի դեկտեմբերին՝ թաքնվելով Լոնդոնում այդ երկրի դեսպանատանը։