Ընտրություններից հետո տարբեր մարզերից ահազանգեր են ստացվում, որ Հայաստանի դեմոկրատական կուսակցության ցուցակով ընտրություններին մասնակցած գործարար, ՀՀԿ-ական նախկին պատգամավոր Տիգրան Արզաքանցյանը հրաժարվում է վճարել շտաբային աշխատանքներում ներգրավված քաղաքացիների աշխատավարձերը։ Վերջերս մի խումբ գյումրեցիներ էին ասուլիս կազմակերպել ու ներկայացնում կատարվածի մանրամասները։ Հիմա էլ Կոտայքի մարզի մի քանի աշխատակից են նույն բողոքը ներկայացնում։ Մեզ հասած տեղեկություններով՝ քաղաքացիները անգամ հաղորդում են ներկայացրել իրավապահներին։ Կոտայքի մարզում բացված շտաբի աշխատակիցները պայմանավորվածության համաձայն պետք է ընտրություններից անմիջապես հետո ստանային աշխատավարձերը, սակայն նրանց մի մասն առհասարակ չի ստացել աշխատավարձը, իսկ մի մասը ոչ ամբողջությամբ է ստացել։ Պարտք մնացած գումարը գերազանցում է 1 միլիոն դրամը։ Աշխատակիցները մեզ պատմեցին, որ իրավապահներն արդեն զբաղվում են այդ հարցով։
Գործարար Տիգրան Արզաքանցյանը այդպես էլ մեր զանգերին չպատասխանեց։ Նրա հեռախոսահամարին պատասխանեց մամուլի խոսնակը՝ Տիգրան Հովհաննիսյանը, ով մեզ փոխանցեց, որ այդ ահազանգերը կեղծ են և որ Արզաքանցյանը որևէ մեկին որևէ լումա պարտք չէ․ «Ես կարող եմ ասել, որ այն քաղաքացիները, որոնք ունեին աշխատանքային պայմանագրեր, բոլորը ստացել են իրենց գումարները և ստացման ընթացքի մեջ են։ Իսկ ինչ վերաբերում է այն քաղաքացիներին, ովքեր ահազանգում են, դա չի համապատասխանում իրականությանը։ Իրենք չունեն ոչ մի պայմանագիր։ Այս գործընթացը որոշ ուժերի կողմից փորձ է խաղալ պարոն Արզաքանցյանի բարի համբավի հետ»,-ասաց Հովհաննիսյանը՝ չհստակեցնելով, թե կոնկրետ ով կամ որ ուժերն են խաղում Արզաքանցյանի բարի համբավի հետ։ «Չեմ հստակեցնի, միայն կասեմ, որ փորձ է արվում սևացնել Արցաքանցյանի անունն ու բարի համբավը։ Արզաքանցյանը իր գործունեությամբ ապացուցել է, որ բարի համբավ ունի և հիմա խաբեությամբ մարդիկ ուզում են ինչ-որ գումարներ կորզել նրանից»,-ասաց մամուլի խոսնակը։
Մեր դիտարկմանը՝ ստացվում է, որ կան աշխատողներ, որոնք ունեցել են աշխատանքային պայմանագրեր, աշխատավարձերը ստացել են, իսկ եղել են աշխատողներ, որ պայմանագիր չեն ունեցել, բայց էլի աշխատել են Արզաքանցյանի համար և հենց նրանք աշխատավարձ չեն ստացել, Հովհաննիսյանը պատասխանեց․ «Մենք չենք ճանաչում այդ մարդկանց։ Անհասկանալի է, թե իրենք ում հետ են համագործակցել։ Իրենք չեն կարող որևէ կերպ հիմնավորել, որ աշխատել են մեզ համար և չեն վճարվել»։