Ամերիկյան էլեկտրական մեքենաների արտադրող Tesla- ի ղեկավար Իլոն Մասկը հնարավոր է համարել, որ ընկերությունը կրկին ավտոմեքենաները վաճառի բիթքոինով, հայտնում է Reuters- ը:
Ելույթ ունենալով B-Word համաժողովում՝ Մասկն ընդգծել է, որ վերականգնվող էներգիայի աղբյուրները գնալով ավելի շատ են օգտագործվում բիթքոինի արդյունահանման ոլորտում: Նա հույս ունի, որ ծպտյալ արժույթի արդյունահանումը առնվազն 50 տոկոսով հիմնված է կանաչ էներգիայի վրա:
«Եթե դա ճիշտ է, ապա Tesla- ն, ամենայն հավանականությամբ, նորից բիթքոին կընդունի»,- ասել է ձեռնարկատերը:
Դեռ 2021 թվականի սկզբին Tesla-ն հայտարարել էր բիթքոինի մեջ 1,5 միլիարդ դոլար ներդրման մասին: Այն ժամանակ ընկերությունը հայտարարել էր, որ սկսում է ընդունել ծպտյալ արժույթը որպես վճարման միջոց: Սակայն արդեն մայիսին Մասկը հայտարարել է, որ Tesla-ն դադարեցնում է բիթքոինների ընդունումը դրա արդյունահանման ոչ էկոլոգիապես մաքուր մեթոդների պատճառով:
Հունիսի կեսերին Մասկը նշել էր Tesla մակնիշի մեքենաների բիթքոինով վաճառքի պայմանը: Այդ ժամանակ նա նույնպիսի պահանջ էր ներկայացրել՝ հայտարարելով, որ ծպտյալ արժույթը պետք է դառնա էկոլոգիապես ավելի մաքուր:
