ՌԴ նախագահ Վլադիմիր Պուտինը Մոսկվայում ընդունել է ադրբեջանցի իր գործընկեր Իլհամ Ալիևին: Բանակցությունների մեկնարկից առաջ Պուտինը հայտնել է, որ գլխավոր հարցերից մեկը տարածաշրջանում իրավիճակի կարգավորումն է:
Տարածաշրջանում տիրող իրավիճակին անդրադառնալիս Ալիևը շնորհակալություն է հայտնել Պուտինին կարգավորման գործում անձնական ջանքերի համար:
«Ինչ վերաբերում է տարածաշրջանում հետկոնֆլիկտային շրջանին, կցանկանայի Ձեզ շնորհակալություն հայտնել տվյալ հարցին մշտական ուշադրություն դարձնելու, շատ կարևոր և զգայուն հարցերին Ձեր անձնական մասնակցության համար: Վերջին 8 ամիսների ընթացքում՝ ռազմական գործողությունների ավարտից հետո, մենք մշտական կապ ենք պահպանում: Մեր անձնական շփումները թե՛ հունվարին Մոսկվայում, թե՛ հեռախոսազրույցների ընթացքում մեծ դերակատարում են ունեցել իրավիճակի կարգավորման համար: Մենք վճռական ենք տրամադրված այն հարցում, որ հետկոնֆլիկտային ժամանակահատվածն անցնի առավելագույնս անցավ: Կարծում եմ՝ ընդհանուր ջանքերով դա մեզ հաջողվում է»,- ասել է Ալիևը:
