«Եվրոպական հեռանկարներ «Արևելյան գործընկերություն» ծրագրի շրջանակներում և Հայաստան-Եվրոպական միություն Ասոցացման համաձայնագրի շուրջ բանակցությունների գործընթացում» համաժողովի ընթացքում ԵԱՀԿ Խորհրդարանական վեհաժողովի նախագահի` Լեռնային Ղարաբաղի հակամարտության հարցերով հատուկ ներկայացուցիչ, Ստոկհոլմի խաղաղության հետազոտությունների միջազգային ինստիտուտի կառավարման խորհրդի նախագահ Գորան Լենմարկերը, խոսելով եվրաինտեգրման մասին, նկատեց, որ հիմնական նպատակն այն է, որ կարողանանք միասին ապրել , ինչքան էլ որ տարբեր դեմքեր ունենանք:
Լենմարկերի գնահատմամբ, ԵՄ-ին անդամակցելու համար Հայաստանը պետք է քաղաքական կամք ունենա. «Հարցը չի վերաբերում տեխնիկական գործընթացներին, այլ այն կապված է քաղաքական կամքի հետ: Եթե դուք ունեք այդ կամքը, գործընթացը կարող է շատ արագ ընթանալ»:
Գորան Լենմարկերն ընդգծեց, որ այդ կամքի կարևորագույն տարր է ժողովրդավարությունը. «ԵՄ-ն անձամբ չունի ժողովրդավարության կանոններ, մենք պարզապես ցանկանում ենք, որ ԵՄ-ին ինտեգրման համար Հայաստանը հետևի ժողովրդավարության կանոններին, մասնավորապես, մարդու իրավունքների հետ կապված, որոնք ամրագրված են Եվրոպական խորհրդի հիմնական փաստաթղթերում: Հայաստանը ԵԽ-ի անդամ է ու լավ գիտի այդ կանոնների մասին: Հարցն այն է, որ պետք է ուղղակի բավարարել բարձր մակարդակի վրա դրված ստանդարատները»:
Լենմարկերը նկատեց, որ եթե Հայաստանը դառնա ԵՄ անդամ, ապա պիտի ընդունի այն օրենքները, որոնք գործում են ԵՄ-ում, իսկ ԵՄ-ն էլ պիտի ընդունի այն օրենքները, որոնք բավարարում են նաև Հայաստանին. «Մենք պետք է միմյանց վստահենք, օրենքների մշակման գործընթացում մենք պետք է միմյանց հետ աշխատենք և մենք պետք է կարողանանք ասել, որ Հայաստանը ժողովրդավար է»:
