Հուլիսի 9-ին Սահմանադրական դատարանը կքննի հունիսի 20-ին տեղի ունեցած արտահերթ խորհրդարանական ընտրությունների արդյունքներն անվավեր ճանաչելու քաղաքական 4 ուժի դիմումը։
Սահմանադրական դատարանը նախօրեին քննել ու մերժել է ՍԴ դատավորներին ներկայացված ինքնաբացարկ բոլոր միջնորդությունները։ ՍԴ դատավոր Վահե Գրիգորյանի ինքնաբացարկի հարցը ՍԴ ներկայացրած դիմումում ներառել էր Ռոբերտ Քոչարյանի ղեկավարած «Հայաստան» դաշինքը։ ՍԴ մեկ դատավոր էլ Հրայր Թովմասյանին էր ինքնաբացարկ ներկայացրել։ Բայց քանի որ ինքնաբացարկի բոլոր միջնորդությունները մերժվել են՝ ընտրությունների արդյունքները վիճարկելու հարցը կքննվի ՍԴ ամբողջական կազմով։
Դատաքննությունն անցկացվելու է բանավոր ընթացակարգով: Գործով զեկուցող է նշանակվել Սահմանադրական դատարանի դատավոր Էդգար Շաթիրյանը: Որպես պատասխանող կողմ դատավարությանը ներգրավվել է Կենտրոնական ընտրական հանձնաժողովը, իսկ որպես հարակից պատասխանողներ՝ ՀՀ դատախազությունը, ոստիկանությունը և Հեռուստատեսության և ռադիոյի հանձնաժողովը:
Հուլիսի 6-ին Սահմանադրական դատարանի կայացրած աշխատակարգային որոշման համաձայն, «Քաղաքացիական պայմանագիր» կուսակցությունը ևս ներգրավվել է որպես երրորդ անձ։ Արդարադատության նախարար Ռուստամ Բադասյանը ֆեյսբուքյան իր էջում գրել էր, որ առաջիկայում կներկայացվի ՔՊ իրավական դիրքորոշումը ներկայացված դիմումների կապակցությամբ։
Իրավապաշտպան Նինա Կարապետյանցը «Առաջին լրատվական»-ի հետ զրույցում ասաց, որ այն Սահմանադրական դատարանը, որը տարիներ շարունակ ինստիտուցիոնալ առումով հաստատել է բոլոր ընտրակեղծիքները և վավերացրել է կեղծված ընտրությունները, իշխանության յուրացումը, ներկայումս էլ գոյություն ունի։ Ինչքան էլ, որ վարչապետը, կամ իշխանության այլ ներկայացուցիչներ պնդեն, թե Սահմանադրական դատարանի հարցը լուծված է, ճգնաժամը հաղթահարված է և այլն՝ ՍԴ-ն նախկին վիճակում է, շարունակում է մնալ չբարեփոխված, քաղաքական գնահատական տրված չէ նախկին ՍԴ-ին և այդ Սահմանադրական դատարանը ունակ է ամեն ինչի և կարելի է ամեն տեսակ արդյունք սպասել.«Արդյունքը կարող է լինել նեյտրալ, կարող է լինել խիստ բացասական, բայց ամենակարևոր հարցն այն է, որ պետք էր այնպիսի բարեփոխումներ իրականացնել, որ արդարադատության համակարգը, հատկապես Սահմանադրական դատարանի նման կարևորագույն ինստիտուտը , նրա գործունեությունը նվազագույն կանխատեսելիություն ունենա։ Հնարավոր լինի պատկերացում ունենալ, թե ինչ սպասել։ Այս պարագայում որևէ սպասելիք, ակնկալիք, կանխատեսում հնարավոր չէ անել։ Սահմանադրական դատարանը ներկայումս անկանխատեսելի է»,-ասաց իրավապաշտպանը՝ ավելացնելով, որ Սահմանադրական դատարանում ներկայումս կան Քոչարյանի ընդգծված ֆանատ դատավորներ, կան նաև ծպտյալ նվիրյալներ, որոնց մասին ժամանակին խոսվել է, բայց իշխանությունը այդպես էլ ականջալուր չեղավ այդ ամենին։ «ՍԴ-ում հիմա Քոչարյանի և Սերժ Սարգսյանի հանցավոր ռեժիմի ժամանակ համակարգին ծառայած դատավորներ կան։ Հետևաբար հնարավոր չէ ասել, թե ինչ կարելի է սպասել ընտրությունների արդյունքների վիճարկումից»,-ասաց Կարապետյանցը։
Մեր դիտարկմանը՝ հաշվի առնելով դիտորդների, միջազգային դիտորդների եզրակացությունները, ընտրությունների օրը արձանագրված խախտումները կարելի՞ է ասել, որ ՍԴ-ն հիմքեր ունի ընտրությունների արդյունքները չեղյալ համարել, իրավապաշտպանը պատասխանեց.«Այդ նույն դիտորդները ժամանակին Սահմանադրական դատարանին ներկայացնում էին աղաղակող խախտումներ ընտրությունների օրվա վերաբերյալ, բայց արդյունքն չէին ունենում։ Հիմա, եթե հակառակ գործողությունն է կատարվում, ապա դա դեռ բավարար հիմք չէ ասելու, որ ՍԴ-ն դրան ականջալուր կլինի։ Հենց դրա համար եմ ասում, որ ներկայիս ՍԴ-ն անկանխատեսելի է։
Հանուն Հանրապետության կուսակցությունը հուլիսի 9-ին պատրաստվում է Սահմանադրական դատարանի դիմաց բողոքի ակցիա իրականացնել։
Կուսակցությունը դեռ ընտրություններից առաջ Բարձրագույն դատական խորհրդի շենքի դիմաց էր բողոքի ակցիա իրականացրել և զգուշացրել չբարեփոխված դատական համակարգով ընտրությունների գնալու ռիսկերը։ Կուսակցության ղեկավար մարմնի անդամ, փաստաբան Վահագն Մարտիրոսյանի խոսքով ռիսկեր միշտ կան նման կազմով սահմանադրական դատարան ունենալու դեպքում: Ոչինչ չի կարելի բացառել.«Այս դատարանները ունակ են նեղ քաղաքական ու անձնական շահերից դրդված քաղաքական որոշակի խմբակների շահեր սպասարկելու համար գնալ ցանկացած քայլի ու ընդունել ցանկացած որակի որոշում՝ նպատակ հետապնդելով ապակայունացնել երկրի վիճակը և ժողովրդի ընտրած կառավարության համար արհեստական խոչընդոտներ ստեղծել»,-ասաց Մարտիրոսյանը։
«Անկախ դիտորդ» դաշինքի ներկայացուցիչներն էլ պնդում են, որ ՍԴ-ն ոչ մի հիմք չունի ընտրությունների արդյունքները անվավեր ճանաչել։ Եթե նման քայլի գնաց ՍԴ-ն, դա հավասարազոր կլինի ինքնասպանության։