Ֆրանսիայում վեց մարդ է ձերբակալվել համավարակի պատճառով գործազրկության նպաստների հետ կապված խարդախության փաստի առնչությամբ, որի հետևանքով տվյալ անձինք ապօրինաբար շորթել էին 12 մլն եվրո: Այս մասին հայտնում է «Եվրոպոլ»-ը:
Գործողությունը, որը տեղի է ունեցել Ֆրանսիայի տարբեր շրջաններում, իրականացվել է այդ երկրի իրավապահ մարմինների կողմից՝ Իսրայելի գործընկերների ու «Եվրոպոլ»-ի հետ համագործակցությամբ:
Չարագործներին հաջողվել էր 12 մլն եվրոյի չափով գործազրկության նպաստ ստանալ Ֆրանսիայի իշխանություններից՝ օգտագործելով 3600 կեղծ ընկերությունների: Գումարները վճարվել էին ֆրանսիական բանկային հաշիվների, ինչից հետո տեղափոխվել էին այլ երկրների բանկային հաշիվներ, ապա փոխակերպվել էին կրիպտոարժույթների:
Հիմնական կասկածյալը՝ Ֆրանսիայի և Իտալիայի 30-ամյա քաղաքացին կնոջ հետ ձերբակալվել է Շվեյցարիայի սահմանից ոչ հեռու՝ Ժնև անցնելու փորձի ժամանակ, որտեղից էլ մտադիր են եղել մեկնել Իսրայել: Խմբավորման մյուս անդամները նրա բարեկամներն են:
