Գերագույն խորհրդի պատգամավոր, ՔՊ ցուցակով պատգամավորի թեկնածու առաջադրված Վիգեն Խաչատրյանը մտահոգիչ է համարում այն հանգամանքը, որ խորհրդարան որպես ընդդիմություն մուտք գործեցին նախկին համակարգի ներկայացուցիչները․«Փաստորեն խորհրդարանական մեծամասնությունը մնաց առանց ընդդիմություն, որովհետև ես նրանց ընդդիմություն չեմ համարում։ Նրանք պարզապես ռևանշիստական նկրտումներ ունեն։ Եթե իրենց մեջ ուժ գտնեն ու դառնան ընդդիմություն՝ հոյակապ կլինի։ Այսինքն՝ ոչ թե արգելակեն երկրի զարգացումը, այլ օժանդակեն, մասնակցեն իրենց առաջարկություններով, քննադատություններով։ Դա Հայաստանի համար հիանալի ու օգտակար կլինի։ Բայց իրենց ամբողջ պահվածքը ցույց է տալիս, որ նրանք հետևություն չեն արել ու մնում են իրենց հին ոճին ու ավանդույթներին հավատարիմ, որն իհարկե տխուր է։ ժամանակը ցույց կտա»,-«Առաջին լրատվական»-ի հետ զրույցում ասաց նա։
Խոսելով այն մասին, թե ինչ գործողություններ են հնարավոր «Հայաստան» դաշինքի կողմից, որը չի ընդունում ընտրությունների արդյունքները, Խաչատրյանը պատասխանեց․ «Ամենակարևորն այն է, որ հասարակության ճնշող մեծամասնությունն իր խոսքն ասաց և ինչպես որ վարչապետն իր խոսքում ասաց՝ հիմնական խնդիրն այժմ ազգային համաձայնության մթնոլորտ ձևավորելն է, լայն ընդգրկում, համագործակցություն հասարակության տարբեր շերտերը ներկայացնող ուժերի հետ։ Պետք է հանգիստ շարվել առաջ՝ առանց ավելորդ խուճապի ու լարվածության»։
Ըստ Խաչատրյանի՝ այժմ բոլորը պետք է հրավիրվեն օրենքի դաշտ․«Մենք էլ պետք է հանգիստ ու հանդարտ մթնոլորտում աշխատենք։ Իսկ ով իրեն այդ մթնոլորտում լավ չի զգա՝ աստիճանաբար կհանդարտվի»։
Մեր զրուցակիցը կարծում է, որ երկրում այժմ քաղաքական ճգնաժամը հաղթահարվեց․ «Մնում է՝ այդ ճգնաժամը հարուցողները հանդարտվեն ու նորմալ աշխատեն»,-եզրափակեց նա։
