Եմենի նախագահ Ալի Աբդալլահ Սալեհը համաձայնել է քննարկել արաբական միապետերի կողմից արված առաջարկը, որի նպատակը Եմենում իրավիճակի կայունացումն է: Այս մասին հայտնում է Reuters-ը` հղում անելով Եմենի պաշտոնատար անձանց:
Գործակալությունը նշում է, որ Սալեհը համաձայնել է քննարկել իշխանությունը հանձնելու գործընթացը, որի նպատակը երկիրը ցնցումներից զերծ պահելն է:
Հիշեցնենք, որ Եմենում ամիսներ շարունակ ընդդեմ նախագահ Սալեհի անցկացվում են բողոքի ցույցեր` պահանջելով նրա հրաժարականը:
2011 թ. հունիսի 3-ին Սալեհը անհայտ անձանց կողմից հարձակման էր ենթարկվել, որի հետևանքով ստացել էր հրազենային մարմնական վնասվածքներ: Նրա վրա կրակ էին բացել մեքենայից, երբ նախագահը գտնվում էր մզկիթի մոտակայքում: Սալեհը բուժվում էր Սաուդյան Արաբիայում:
