Հայաստանում ԱՄՆ դեսպանատունը Հայաստանում գտնվող ԱՄՆ քաղաքացիներին հորդորել է առաջիկա 2 շաբաթներին լինել ուշադիր, խուսափել մարդկանց բազմությունից և մշտապես լինել զգոն ու կապ պահպանել հարազատների հետ՝ նկատելով, որ առաջիկա երկու շաբաթների ընթացքում ընտրությունների հետ կապված երթեր կամ ցույցերը կարող են տեղի ունենալ Երևանում և Հայաստանի այլ վայրերում:
Այս խնդրի առնչությամբ միջազգայնագետ Սուրեն Սարգսյանն «Առաջին լրատվական»-ի հետ զրույցում նշեց. «Բնականաբար Միացյալ Նահանգները հետևում է Հայաստանում տեղի ունեցող զարգացումներին, բնականաբար, գիտեն, որ ընտրություններին նախորդող ժամանակահատվածում լինելու են հանրահավաքներ, նույնը վերաբերում է հետընտրական պրոցեսներին, և դրա համար իրենց քաղաքացիներին նման զգուշացում են անում: Սա միայն Հայաստանին չի վերաբերում, ցանկացած երկրում, որտեղ նման նախընտրական մթնոլորտ է լինում և կարող են լինել որոշակի լարումներ, նման հայտարարություն ԱՄՆ դեսպանությունն անում է»:
Հարցին, թե սա որոշակի վախի մթնոլորտ չի առաջացնի՞ իրենց քաղաքացիների մոտ, նա պատասխանեց. «Չեմ կարծում, որովհետև սա հերթական նախազգուշացումն է, ԱՄՆ քաղաքացիները պարբերաբար իրենց կառավարությունից նման մեսիջներ ստանում են: Ցանկացած ժամանակ, ցանկացած լարման դեպքում, ցանկացած հնարավոր պոտենցիալ բախման դեպքում ԱՄՆ-ն իր քաղաքացիներին նման կոչերով դիմում է, մանավանդ այն դեպքերում, երբ հնարավոր են ցույցերի ժամանակ բախումներ, նաև ոստիկանության հետ բախումներ: Ես չեմ կարծում, որ սա բացառիկ մի բան է, որի վրա պետք է լուրջ սևեռվել»:
Սուրեն Սարգսյանն անդրադարձավ նաև Բայդեն-Պուտին հանդիպմանը, որտեղ համատեղ հայտարարություն է ընդունվել ռազմավարական կայունության վերաբերյալ:
«Այս հանդիպումն ինքնին պատմական է, որովհետև Պուտինն ու Բայդենը այս ձևաչափով երբեք չէին հանդիպել: Պատմական է՝ հաշվի առնելով երկու երկրների լարված հարաբերությունները, հաշվի առնելով այն, որ բավականին լայն քննարկման համար տասնյակ թեմաներ կային: Ռուսական մամուլը գրել էր, որ ԼՂ խնդրին նույնպես անդրադարձ կլինի, բայց դեռևս այս պահի դրությամբ որևէ տեղեկություն չկա՝ անդրադարձ եղել է, թե ոչ:
Միգուցե մոտ ժամանակներս ինչ-որ հայտարարություններ, մեսիջներ լինեն Արցախի վերաբերյալ հնարավոր քննարկումների վերաբերյալ:
Համենայնդեպս պատմական հանդիպում էր, որը կարծում եմ՝ ոչ թե ռուս-ամերիկյան հարաբերություններում կայունություն կմտցնի, բայց համենայնդեպս ինչ-որ ընդհանուր շահեր, համագործակցության ընդհանուր եզրեր կարծես թե գտնվել են և դրա մասին խոսել են»,-հայտարարեց միջազգայնագետը: