Միացյալ Նահանգները շարունակում է ուսումնասիրել Ադրբեջանին տարատեսակ օգնություն, այդ թվում և ռազմական աջակցություն տրամադրելու հետագա նպատակահարմարությունը՝ հաշվի առնելով Լեռնային Ղարաբաղի շուրջ հակամարտության գոտում լարվածության պահպանումը: Սենատում արտաքին գործերի հանձնաժողովում լսումների ժամանակ հայտարարել է ԱՄՆ պետքարտուղար Էնթոնի Բլինկենը:
Հանձնաժողովի ղեկավար Ռոբերտ Մենենդեսը հայտարարել է, որ հիասթափված է ԱՄՆ ղեկավարության՝ բացառության կարգով Ադրբեջանի կառավարությանը, այդ թվում և ռազմական օգնություն տրամադրելու որոշմամբ: Նման որոշման մասին ԱՄՆ իշխանությունները հայտարարել էին մայիսին:
«Մենք շարունակելու ենք ուսումնասիրել հարցը: Ես ակտիվորեն աշխատել եմ սրա շուրջ: Հատկապես գերիների վերադարձի, բանակցությունների շուրջ` նպատակ ունենալով կարգավորելու հակամարտությունը»,- ասել է ԱՄՆ պետքարտուղարը՝ հրաժարվելով այլ մեկնաբանություններից:
Ամերիկայի հայկական համագումարի տարածաշրջանային գրասենյակի տնօրեն Արփի Վարդանյանի կարծիքով՝ դժվար է ասել, արդյոք Միացյալ Նահանգները կհրաժարվի Ադրբեջանին ռազմական օգնություն տրամադրելու գաղափարից, բայց այդ ուղղությամբ պետք է ակտիվ աշխատանքներ իրականացվեն թե՛ ամերիկահայերի, ամերիկահայ կազմակերպությունների և թե ՀՀ կառավարության կողմից․«Աշխատանք պետք է տարվի նաև Արցախի կողմից։ Ջանքեր պետք է թափվեն ԱՄՆ-ին հասկացնելու, որ այսպես շարունակվել չի կարող և օգնության տրամադրումը պետք է կասեցվի։ Չեմ կարող ասել, որ միանշանակ կստացվի, բայց հավանականություն կա, քանի որ մթնոլորտը բարենպաստ է։ Պետք է ապացուցենք, ամենօրյա աշխատանքով ցույց տանք, թե ինչ ահաբեկչական քաղաքականություն են իրականացնում Ադրբեջանն ու Թուրքիան։ Ընդ որում՝ այս աշխատանքը պետք է տանենք ամբողջ աշխարհում և ոչ միայն ԱՄՆ-ում»-«Առաջին լրատվական»-ի հետ զրույցում ասաց նա։
Մեր զրուցակիցն անդրադարձավ նաև Եվրոպայի և Եվրասիայի հարցերով ԱՄՆ-ի պետքարտուղարի օգնականի պաշտոնակատար Ֆիլիպ Ռիքերի տարածաշրջանային այցին․ «Նրան ևս պետք է հանգամանալից բացատրվի, թե Ադրբեջանին ռազմական օգնություն տրամադրելը ինչ վտանգ է ներկայացնում Հայաստանի համար։ Գիտեք նաև, որ առաջիկայում տեղի է ունենալու Էրդողանի ու նախագահ Բայդենի հանդիպումը։ Ակնկալիքներ կան, որ այդ հանդիպումն ի նպաստ Հայաստանի կարող է լինել։ Այնպես չէ, որ ամեն շաբաթ կամ օրը մեծ ԱՄՆ-ից նման բարձրաստիճան այցելություններ են տեղի ունենում։ Բայց եթե գալիս են, պետք է առիթն օգտագործել ու բարձրացնել Հայաստանի շահերից բխող հարցեր։ Նա էլ՝ ԱՄՆ վերադառնալիս իր դիրքորոշումը կփոխանցի իր գործընկերներին, կասի՝ սա է իրականությունը, եթե մենք չդադարեցնենք ռազմական օգնությունը՝ հետևանքները հայ ժողովրդի համար կարող են ծայրաստիճան վտանգավոր լինել։ Ես գիտեմ, որ ԱՄՆ-ում այս հարցը կարևորում են, մենք էլ մեր հերթին պետք է ջանք ու եռանդ չխնայենք»։
Արփի Վարդանյանը կարծում է, որ Բայդենի վարչակազմի օրոք որոշակիորեն փոխվել է Հայաստանի հանդեպ ԱՄՆ վերաբերմունքը․«Հուսով եմ՝ ժամանակի ընթացքում ավելի շատ կտեսնենք այդ փոփոխությունը։ Օրինակ՝ Բայդենը ապրիլի 24-ին օգտագործեց Ցեղասպանություն բառը, դա շատ կարևոր ուղերձ էր։ Այսօր Հայաստան է գալիս Ռիքերը։ Ես չեմ հիշում վերջին շրջանում երբևէ նման բարձրաստիճան պաշտոնյա եկել Հայաստան։ Սա շատ կարևոր նշան է։ Մի բան է ուրիշներից լսել, ուրիշների պատմածին հետևես, այլ բան է ՝ ինքդ գաս ու տեսնել ռեալ իրավիճակը։ Այո՛ Հայաստանի հանդեպ վերաբերմունքը փոխվում է ու սա պետք է արձանագրեն նաև Հայաստանում ու փոխշահավետ համագործակցություն առաջարկեն։ Հուսով եմ, որ Հայաստանից կլինեն առաջարկներ։ Դա խիստ անհրաժեշտ է»,-եզրափակեց նա։