Երևանում հունիսի 5-ին մեկ հարկի տակ կհավաքվեն Հայաստանի տնտեսական զարգացման գործում և արցախյան պատերազմի ժամանակ նախաձեռնողականությամբ առանձնացած կին գործարարները: Առիթը «Բարության և առաջնորդության խորհրդանիշ» ամենամյա մրցանակաբշխությունն է:
«Արմենպրես»-ի մամուլի սրահում հրավիրված ասուլիսում Միջազգային գործարար կապերի աջակցման խորհրդի նախագահ Մարիամ Մանուկյանը նշեց, որ «Բարության և առաջնորդության խորհրդանիշ» անվանակարգում պարգևատրվելու են Հայաստանի տնտեսության զարգացման գործում, ինչպես նաև պատերազմի ժամանակ ակտիվություն, նախաձեռնողականություն ցուցաբերած հայ և այլազգի 7 կին գործիչներ:
«Մեր մրցանակակիրները ժամանել են տարբեր երկրներից՝ ՌԴ-ից, ԱՄՆ-ից, Շվեյցարիայից և այլն: Նրանք բարերարներ, գործիչներ են, որոնք ցանկություն արտահայտեցին աջակցելու պատերազմի հետևանքով տուժած արցախցիներին: Մենք ցանկանում ենք ներկայացնել բարու առաքելությունը, ներկայացնել մարդկանց, որոնք օրինակելի են՝ ակնկալելով, որ այն լավ իմաստով վարակիչ կդառնա շատերի համար»,- ասաց Մարիամ Մանուկյանը: Թե ովքեր են մրցանակակիրները, նախաձեռնողները, շատ փակագծեր չեն ցանկանում բացել, սակայն Մարիամ Մանուկյանն առանձնացրեց երկուսին, որոնք արդեն գիտեն մրցանակի մասին: Նրանցից մեկը պոլսահայ Անի Քուրտյանն է, որը մեծ աջակցություն է ցուցաբերել աուտիզմով հիվանդ երեխաների դպրոցին և արցախյան պատերազմի ժամանակ իր մեծ ներդրումն է ունեցել տուժած արցախցիներին աջակցելու գործում: Մարիամ Մանուկյանը նկատեց, որ նա բարեգործություններ է արել բազմաթիվ այլ տեղերում, աշխարհի մի շարք երկրներում, որտեղ ապրում են հայեր:
Հաջորդ մրցանակակրին՝ Շվեյցարիայից Թերեզեա Մխիթարյանին ներկայացրեց «Կանանց և երիտասարդների աջակցության և զարգացման կենտրոն»-ի հիմնադիր Հասմիկ Սահակյանը: Թերեզա Մխիթարյանը ակտիվ գործունեություն է ծավալել սահմանամերձ գյուղերում՝ բնակարաններ ձեռք բերելուն, գյուղատնտեսական ծրագրերում աջակցություն ցույց տալուն և այլն:
Ի՞նչ սկզբունքով են ընտրվել մրցանակակիրները:
«Անունների ընտրության հետ կապված եղան քննարկումներ, պետք էր հստակեցնել մի քանի հարց. ո՞րն է մեր այսօրվա հերոսը, այդ բարության ու առաջնորդության խորհրդանիշը ո՞րն է, ինչպիսի՞ նկարագիր պետք է նա ունենա: Ասեմ, որ առաջարկները շատ էին, եղան քննարկումներ ու քվեարկությամբ որոշվել են այդ 7 կանանց անունները»,- ասաց Թերեզա Մխիթարյանը:
Մարիամ Մանուկյանն ավելացրեց, որ նման անունները շատ են, և առանձնացվել են նրանք, որոնք իրենց ներդրումն են ունեցել արցախյան պատերազմում տուժած ընտանիքներին աջակցելու գործում: Մրցանակաբաշխության նախաձեռնողները պատրաստվում են մրցանակակիրների պատմությունները, արած գործը ներկայացնել հանրության ավելի լայն շրջանակների՝ ներգրավելով ուսանողների, դպրոցականների:
