«Առաջին լրատվական»-ի հարցերին պատասխանել է Արցախի ԱԺ պաշտպանության, անվտանգության և օրինապահության հարցերի մշտական հանձնաժողովի նախագահ, «Միասնական հայրենիք» խմբակցության պատգամավոր Սեյրան Հայրապետյանի հետ:
Արցախում վերջին շրջանում կադրային փոփոխություններ են տեղի ունենում: Օրերս էլ Արայիկ Հարությունյանը պետնախարար նշանակված Արտակ Բեգլարյանին գովեստի խոսքեր ասաց: Տեսակետ կա, որ այս կադրային փոփոխությունները Արցախի նախագահը միանձնյա է անում: Դուք ինչպես եք գնահատում դրանք և արդյոք այստեղ խնդիր տեսնում եք:
Հարցը Արայիկ Հարությունյանի մեջ չէ: Արայիկ Հարությունյանը Արցախի ընտրված նախագահն է և իրականացնում է Սահմանադրությամբ իրեն վերապահված պարտականությունները: Կադրային քաղաքականությունը ևս նախագահի սահմանադրական իրավունքն է և պարտականությունը: Ինչ վերաբերում է Արտակ Բեգլարյանի մասնագիտական և մարդկային որակներին, ապա Արտակ Բեգլարյանը, ճիշտ է, ցավոք սրտի, ունի ֆիզիկական սահմանափակում, բայց նրա մասնագիտական և մարդկային որակների վրա ոչ ոք կասկածելու իրավունք չունի, քանի որ նա իր աշխատանքով ցույց է տալիս և մասնագիտական բարձր գիտելիքները, և մարդկային բարձր որակները թե Մարդու իրավունքների պաշտոնում աշխատելով, թե նախագահի աշխատակազմի ղեկավարի պաշտոնում, թե հասարակ մարդկանց հետ իր շփումներով: Հիմա պետք է նրան իր նոր աշխատանքում ցանկանալ բեղմնավոր աշխատանք:
Ընդհանուր առմամբ այս կադրային փոփոխություններն ինչպե՞ս եք գնահատում: Օրերս էլ տեսանք, որ Վերահսկիչ պալատի նախագահի փոփոխություն տեղի ունեցավ: Ինչո՞վ են պայմանավորված դեռ նոր-նոր ձևավորված կառավարության մեջ իրար հաջորդող հրաժարականներն ու փոփոխությունները:
Մենք գործ ունենք հետպատերազմյան իրավիճակի հետ, որի մասին շատ ենք խոսել: Այս կամ այն պաշտոնյան նույնիսկ խաղաղ ժամանակ իրականացնելով իր գործառույթները, երբեմն պատերազմից հետո նպատակահարմար չի համարում իր գործունեությունը տվյալ ոլորտում: Այստեղ կա և մարդկային մոտեցում, և այլ մոտեցումներ: Ինչ վերաբերում է Հաշվեքննիչ պալատի ղեկավարին, այնտեղ եղել են նաև դատական պրոցեսներ, մինչ այդ մարդը ներկայացրել էր հրաժարականի դիմում: Դա իր իրավունքն է: Թե այդ մարդկանց մասնագիտական գիտելիքներն ինչպե՞ս է օգտագործվելու և որ ոլորտում, ժամանակը ցույց կտա: Մի մասն արդեն նշանակվել են համապատասխան պաշտոններում, մի մասը՝ դեռևս ոչ: Ճիշտ է, կադրային քաղաքականության մեջ ցանկալի չէ, որ մի ոլորտում մի քանի ամիս աշխատած մարդը գա, ցանկալի է, որ նույն մարդը իր աշխատանքը շարունակի ի նպաստ երկրի, բայց երբեմն անհրաժեշտություն է լինում խուսանավել, ավելի ճկուն կադրային քաղաքականություն վարել: Ես որպես ԱԺ պատգամավոր և հանձնաժողովի նախագահ և Արցախի քաղաքացի ինչ-որ տեղ դա նորմալ եմ ընդունում:
Դուք նորմա՞լ եք համարում, որ Արցախի խորհրդարանի տարբեր պատգամավորներ, խմբակցություններ Հայաստանում աջակցում են Ռոբերտ Քոչարյանին, ըստ էության քաղաքական հայտ են ներկայացնում:
Արցախի Հանրապետությունը հայաստանյան ընտրություններին չի մասնակցում, բնականաբար: Իսկ մարդկային տեսակետից, Արցախի ԱԺ պատգամավորը ևս մարդ է, որ մտահոգ է իր ազգի, իր պետության մասին, ամեն մարդ իրավունք ունի իր կարծիքը արտահայտել այս կամ այն քաղաքական գործչի վերաբերյալ՝ ունենալով նաև իր տեսլականները, հաշվի առնելով այս կամ անձի գիտելիքներն ու անցած ուղին: Իսկ պետական լծակներ օգտագործելը, ըստ ինձ ճիշտ չէ, քանի որ Արցախը հայաստանյան ընտրություններին չի մասնակցում: Բայց ուշի-ուշով հետևում ենք և ունենք մեր անհատական և կուսակցական մոտեցումները, որի մասին բազմիցս հայտնել ենք և պատրաստ ենք էլի անդրադառնալ:
Ինչպիսի՞ն է ձեր կարծիքը սահմանազատման ու սահմանագծման գործընթացի վերաբերյալ՝ հաշվի առնելով, որ շատերը նշում են, որ դրանով Արցախի ճանաչման գործընթացը ընդհանրապես փակուղի կմտնի:
Կա այդպիսի մտավախություն: Հայաստանի հատվածում սահմանազատման և սահմանագծման աշխատանքը կատարելը, որ մեր զինվորը հստակ իմանա, որ սա իր տարածքն է ու պետք է սահման լինի հստակ, կարևոր է: Էս վերջին իրադարձություններից հետո պարզ դարձավ, որ որոշ տարածքներում դեռևս հստակ սահմանագծում չկա, բայց բոլոր դիվանագիտական և այլ փաստաթղթերում պիտի Արցախի կարգավիճակի հարցը դուրս չմղվի: Այս ընթացքում ցանկալի կլիներ, և անհրաժեշտ կլիներ, որ այս պահի դրությամբ հստակեցվեին որոշ սահմանազատման աշխատանքներ Արցախի Հանրապետության տարածքում, քանի որ հստակ հրամանատարը, զինվորը պետք է իմանա, որ սա իր տարածքն է և այդ տարածքում թշնամին իրականացնում է հարձակողական, թշնամական գործողություններ: Դրա համար այս հարցը շատ նուրբ հարց է: Ես ամեն դեպքում և ցանկություն և դիրքորոշում ունեմ հայաստանյան ներքաղաքական կյանքի կայունացման առումով, որից հետո արդեն այս հարցերի լուծումն ավելի հստակ կկատարվի: ներկայումս այս կամ այն գործողությունը կատարելով ընդդիմությունը մեղադրում է իշխանությանը, իշխանությունը մեղադրում է ընդդիմությանը, ու երբեմն նաև այնպիսի հարցեր են դրվում քաղաքական հարթակում, որ մեր սրբության սրբոցն է, մեր բանակն է, մեր զոհված նահատակված հերոսներն են, անհայտ կորածներն են: Ամեն ինչում այսօր տեսնում ենք շահարկում: Այսօր շատ անցանկալի քաղաքական երևույթներ ենք տեսնում: Ես հույս ունեմ, որ ընտրություններից հետո բոլոր ուժերը կգան կոնսենսուսի: