Երևանի ընդհանուր իրավասության դատարանը պարտավորեցրել է վերացնել ԲԴԽ լիազորությունները ժամանակավորապես կասեցված նախագահ Ռուբեն Վարդազարյանի իրավունքների և օրինական շահերի խախտումը։ Երեկ Երևանի ընդհանուր իրավասության դատարանը՝ դատավոր Դավիթ Հարությունյանի նախագահությամբ, բավարարեց Ռուբեն Վարդազարյանին որպես մեղադրյալ ներգրավելու մասին որոշման դեմ Վարդազարյանի բողոքը։ Դատարանն արձանագրել է, որ վարույթ իրականացնող մարմինը պարտավոր էր հաղթահարել Ռուբեն Վարդազարյանի գործառութային անձեռնմխելիությունը, ինչը չի կատարվել։
Բարձրագույն դատական խորհրդի անդամ Գրիգոր Բեքմեզյանը «Առաջին լրատվական»-ի հետ զրույցում ասաց, որ շարունակում է պնդել, որ ԲԴԽ-ն դեռևս այդ ժամանակ Վարդազարյանի գործառութային անձեռմխելիությանը անդրադառնալու իրավասություն չուներ, քանի որ չուներ գործի բոլոր հանգամանքներ, կար նախաքննական գաղտնիք և գործի նյութերը ամբողջությամբ իրենց տրամադրված չէր.«Դեռևս այն ժամանակ եմ ասել, որ դատարանը ինքը պետք է որոշեր՝ գործառութային անձեռմխելիությունը հաղթահարելու անհրաժեշտություն կար, թե չկար։ Դատախազությունն է գտել, որ չկա նման անհրաժեշտություն և չի դիմել ԲԴԽ-ին գործառութային անձեռմխելիության պահանջով։ Ես նախկինում էլ ասել էի, որ եթե պարոն Վարդազարյանը բողոքարկի, վիճարկի դա դատարանում, ապա մենք արդեն կհետևենք դատարանի որոշմանը։ Իհարկե, ես դատարանի որոշում ասելով նկատի ունեմ դատարանի՝ օրինական ուժի մեջ մտած որոշումը, քանի որ առաջին ատյանի որոշումը դեռ կարող է բողոքարկվել։ Մենք կառաջնորդվենք վերջնական դատական ակտով, որը արդեն մեզ համար կլինի պարտադիր կատարման ենթակա ակտ»,-ասաց Բեքմեզյանը։
ԲԴԽ անդամի խոսքով՝ քանի որ իրենք արդարադատություն չեն իրականացնում, ապա միանշաակ հնարավոր չէ պնդել՝ ԲԴԽ-ն պետք է անդրադառնար գործառութային անձեմխելիության հարցին, թե ոչ։ Մեր զրուցակիցը կրկին պնդեց, որ դա ավելի շատ դատարանի գործառույթն է։
Ինչ վերաբերում է առաջին ատյանի դատարանի որոշմանը և դրա հետևանքներին, ապա Բեքմեզյանն ասաց, որ դեռ ծանոթ չէ որոշմանը, ծանոթ է այնքան, որքան կա մամուլում, հետևաբար չի կարող ասել, թե դա ինչ է ենթադրում։
Ռուբեն Վարդազարյանի փաստաբան Հովհաննես Խուդոյանը լրատվամիջոցների հետ զրուցյում ասել է, թե դատարանի որոշումը ենթադրում է, որ Ռուբեն Վարդազարյանի վերաբերյալ քրեական գործով վարույթը ենթակա է կարճման։
Գլխավոր դատախազությունից «Առաջին լրատվական»-ին փոխանցեցին, որ դատարանի որոշումը դեռ դատախազությունը չի ստացել, դրա հիմքերին և պատճառաբանական մասին ծանոթանալուց հետո բողոքարկելու կապակցությամբ որոշում կկայացվի:
Ակնհայտ է, սակայն, որ Վարդազարյանը դատական համակարգում ունեցած իր կապերի միջոցով փորձում է հետ վերադառնալ իր պաշտոնին և չեզոքացնել Գագիկ Ջհանգիրյանին, որին համարում է իր մրցակիցը։ Կհաղթեն կոռուպցիո՞ն կապերը, թե՞ արդարությունը, պարզ կդառնա առաջիկայում ։