Հուլիսի 1-ից ուժի մեջ կմտնի բջջային հավելվածի միջոցով տրանսպորտային միջոցով խախտում կատարելու վերաբերյալ հաղորդում տալու կարգը։
Android և iOS հավելվածների դիզայնն ամբողջությամբ պետք է համապատասխանի Google Material Design-ի և Apple Human Interface Guidelines-ի ստանդարտներին։
Ավտովարորդների իրավունքների պաշտպանությամբ զբաղվող Սերգեյ Ղահրամանյանը «Առաջին լրատվական»-ի հետ զրույցում ասաց, որ այս փոփոխութունը երկու տարի առաջ է ընդունվել, բայց կառավարության կողմից երկու անգամ հետաձգվել է։ Հիմա մնացել է 1 ամիս կարգավորումը ուժի մեջ մտնելու համար, բայց, մեր զրուցակցի համոզմամբ՝ նորից է այն հետաձգվելու.«Ներկայումս երկրում տիրող վիճակի պայմաններում դժվար թե այդ կարգավորումը ինչ-որ բան փոխի։ Նախկինում խնդիրները այլ Էին, առաջնահերթությունները այլ էին, իսկ հիմա այլ։ Դրա համար ես կարծում եմ, որ այդ նոր կարգի կիրառումը նորից կհետաձգվի։ Բայց վարորդները չպետք է նյարդայնանան նոր կարգավորումներից։ Նրանք պարզապես պետք է առանց խախտումների մեքենա վարեն։ Հիմա շատ վատ վիճակ է ստեղծվել։ Եթե նախկին վիճակագրության համաձայն օրական 1 զոհ էիք ունենում, ապա հիմա օրական 2-3 զոհ է գրանցվում հանրապետությունում, որը շատ է։ Մենք այն երկիրը չենք, որ կարող ենք մեզ նման ճոխություն թույլ տալ»,-ասաց Ղահրամանյանը։
Մեր հարցին, թե ինչով է պայմանավորված ավտոպատահարների, զոհերի թվի աճը, Ղահրամանյանը պատասխանեց, որ ելնելով նրանից, որ առանձնապես փոփոխություններ չեն կատարվել և ավտոմեքենաների թիվն առանձնապես չի աճել, ապա հիմնական պատճառը երկրում ստեղծված իրավիճակն է։ «Հետպատերազմյան հոգեբանական ծանր վիճակում են գտնվում մարդիկ, մտքերով լարված են, դյուրագրգիռ են, անհամբեր են, անհանդուրժող են և դրա պատճառով ունենք բազմաթիվ դեպքեր։ Դեպքեր են եղել, երբ պատերազմից հետ վերադառնալուց կամ մեկնելուց վթարներ են եղել և բարձր արագությունը ոչ մեկին չի խնայել։ Որքան էլ պատճառներ են բերվում, թե շտապում էին, արագությունը պատճառաբանված է, բայց դրանք արդարացումներ են, բարձր արագությունը ոչ մի պատճառ չի հասկանում, չի խնայում ոչ մեկին։ Եվ այս վիճակը հիմա խտացել է ու պայթել։ Դրա համար ամեն օր մահվան ելքով վթարներ են»,-ասաց Ղահրամանյանը՝ հավելելով, որ առաջիկայում վիճակը չի մեղմվի, քանի որ ընտրություններ են, առկա լարվածությունը կպահպանվի ու կունենա իր հետևանքները։
Մեր զրուցակցի խոսքով՝ երկրում ստեղծված իրավիճակի պատճառով ոստիկանությունն էլ չի կարողանում իր գործառույթները իրականացնել։ Նրանք հիմնականում զբաղված են ցույցեր ցրելով, ուղեկցելով։ Իսկ դրանից զատ արդեն հուլիս ամսից ճանապարհային ոստիկանություն այլև չի լինելու, ծառայություն է իրականացնելու պարեկային ծառայությունը։ Դրա համար հիմա արդեն ճանապարհային ոստիկաններ կան, որ դուրս են գալիս աշխատանքից, թափուր տեղեր են, իսկ հուլիս ամսից մտնող պարեկային ծառայողները նախկինում ճանապարհային ոստիկաններ չեն եղել և լիարժեք վերահսկողություն սահմանելու համար բավական ժամանակ կպահանջվի.«Գործընթացը դեռևս փորձաշրջանում է, դրա համար ամենաքիչը 6, իսկ գուցե նաև 1-2 տարի պահանջվի։ Մոտ այդքան ժամանակ է պետք վերահսկողության հասնելու համար, որը ամենադժվարն է, քանի որ պարեկային շատ ծառայողներ քաղաքացիական կյանքից են մտնում համակարգ և նրանց փորձաշրջան է անհրաժեշտ , որպեսզի իրեն գործողությունները ծառայության հետ համահունչ իրականացնեն։ Իմ դիտարկումները այնպիսին են, որ 6 ամիս 1 տարի ժամանակահատվածում երթևեկության որակի բարձրացման մասով որևէ ակնկալիք չպետք է ունենալ»,-եզրափակեց Սերգեյ Ղահրամանյանը։
