Արդեն հայտնի է, որ հունիսի 20-ին կայանալիք արտահերթ խորհրդարանական ընտրություններին մասնակցելու հայտ են ներկայացրել ռեկորդային թվով քաղաքական ուժեր՝ 4 դաշինք և 23 կուսակցություն: Այս պայմաններում որքանով է հնարավոր, որ կլինի իրական մրցակցային ընտրություններ և արդյոք մեծ թվով ուժերի մասնակցությունը չի հանգեցնելու ձայների փոշիացման: Այս խնդիրների շուրջ «Առաջին լրատվական»-ը զրուցել է քաղաքագետ Էմիլ Օրդուխանյանի հետ:
«Սա Հայաստանի երրորդ Հանրապետության պատմության մեջ ամենաշատ ուժերի առաջադրումով ընտրություններն են, և այս իմաստով սա աննախադեպ է: Հետևապես, այս ընտրությունները նաև աննախադեպ են լինելու ձայների փոշիացման հավանականության առումով, որովհետև ներկայացված քաղաքական ուժերի ճնշող մեծամասնությունը մինչև մեկ տոկոս դժվար հավաքեր: Եթե այդ տրամաբանությամբ ենք նայում, 10-15 տոկոսից ավելի ձայներ, կամ գուցե ավելի, կարող է փոշիանալ ընտրություններին՝ հաշվի առնելով այն մտահոգությունը, որ քաղաքացիների՝ ընտրություններին մասնակցելու տրամադրություններն էլ այդքան բարձր չեն: Այս պահի դրությամբ կան մեծ թվով քաղաքացիներ, որոնք չեն ցանկանում մասնակցել ընտրություններին, ինչը նույնպես բացասական ազդեցություն է ունենալու ընտրության արդյունքների, ինչպես նաև նոր խորհրդարանի լեգիտիմության վրա»,-ասաց քաղաքագետը:
Նա կարծիք հայտնեց, որ քաղաքական ուժերը պետք է աշխատեն հանրության մասնակցությունը խթանելու ուղղությամբ. «Միայն այդ դեպքում է հնարավոր, որ այդ քվեների քանակի մեջ դուրս կգա այն քաղաքական ներկապնակը, որը կանցնի խորհրդարան»:
Անդրադառնալով տեսակետին, որ մարդիկ ոչ թե խորանալու են ցուցակների մեջ, այլ նայելու են ցուցակի առաջին դեմքերին և հիմնական պայքարը լինելու է հենց առաջին դեմքերի միջև, Էմիլ Օրդուխանյանն ասաց. «Քանի որ մեզ մոտ սովորաբար այդպես է եղել, այս անգամ ևս բացառություն չի լինելու, որովհետև սրանք արտահերթ ընտրություններ են և ժամանակը նույնիսկ բավարար չեղավ, որպեսզի նախորդ արտահերթ ընտրություններից հետո քաղաքացիների մոտ ձևավորվեր այդ քաղաքական վարքագիծը՝ ընտրություն կատարել ծրագրերի, գաղափարների, արժեքների, այլ ոչ թե անձանց միջև: Այնպես որ այս պարագայում նույնպես կունենանք այդպիսի ընտրություններ: Այն ֆիգուրները, որոնք ավելի շատ հայտնի են հանրության շրջանում, նրանց հնարավորություններն ավելի մեծ են լինելու ԱԺ անցնելու»:
Քաղաքագետը նկատեց, որ միտումը տանում են նախկին-ներկա ընտրապայքարի տրամաբանությամբ. «Բայց կարծում եմ, որ շատ ավելի հետաքրքիր նրբերանգ կհաղորդեն ընտրապայքարին հեղափոխության արդյունքում ծնված ուժերը: Այսինքն իրենք ունեն հնարավորություն դուրս գալու հին-նոր, դավաճան-փրկիչ այդ խոսույթից և քաղաքական թռիչք ապահովել: Որքանով կտարբերվեն նախկին-ներկայի տրամաբանութունից, չեն ձուլվի այդ իրականությանը, այնքանով էլ իրենց հնարավորությունները կլինեն ավելի մեծ, որովհետև ժողովուրդը, ըստ էության, այդ խոսույթից հոգնել է, հոգեմաշ է եղել: Իրենք էլ ուզում են տեսնել իրական այլընտրանք և այստեղ այդ նոր ուժերի շանսերն ավելանում են»,-ասաց նա:
Հարցին, թե Սյունիքի վերջին դեպքերը որքանով կարող են ընտրական պրոցեսները ստվերել, Օրդուխանյանը պատասխանեց. «Ոչ միայն Սյունիքի դեպքերը, այլև գեղարքունիքի հատվածում այսօրվա իրավիճակը: Ցավոք սրտի, եթե չլինեն գործուն, դիվանագիտական քայլեր, ես նկատի ունեմ ՄԱԿ-ի Անվտանգության խորհրդին դիմելը, ապա չկա որևէ երաշխիք, որ այդ լարվածությունը գնալով չի ավելանալու Ադրբեջանի կողմից, գուցե նաև ուրիշների հրահրումով, որպեսզի նրանք ազդեն ՀՀ-ում կայանալիք ընտրությունների թե որակի, թե արդյունքների վրա: Ես ուղղակի համոզված եմ, որ այս ընտրությունները ոչ միայն Հայաստանում իշխանության հարցն են որոշելու, այլ ինչն ավելի կարևոր է, ինքնիշխանության հարցը»:
