Արցախի Հանրապետության Ազգային Ժողովի մայիսի 27-ի նիստում Մարդու իրավունքների պաշտպան Գեղամ Ստեփանյանը ներկայացրել է Մարդու իրավունքների պաշտպանի 2020թ. գործունեության, ինչպես նաև մարդու իրավունքների և ազատությունների պաշտպանության վիճակի մասին տարեկան հաղորդումը:
Ինչպես «Արմենպրես»-ին տեղեկացրին ԱՀ մարդու իրավունքների պաշտպանի աշխատակազմից, Պաշտպանը նշել է, որ հաշվետու տարում ՄԻՊ աշխատակազմը 481 անձանցից ստացել է 377 դիմում` սոցիալական ապահովության, աշխատանքային, պատշաճ վարչարարությանև մի շարք այլ իրավունքների վերաբերյալ:
Ըստ աղբյուրի՝ Գեղամ Ստեփանյանը ըստ ոլորտների անդրադարձել է արձանագրված խնդիրներին` ամփոփ ներկայացնելով դրանց լուծմանն ուղղությամբ կատարված և կատարվելիք աշխատանքները:
«Պաշտպանը նշել է, որ ի տարբերություն 2019 թվականի հաղորդման, տարեկան հաղորդման մեջ չի ընդգրկվել պաշտպանի գործունեության մի շարք ուղղությունների վերաբերյալ տեղեկություններ` պայմանավորված պատերազմական և հետպատերազմյան իրավիճակում պաշտպանի աշխատակազմի ծանրաբեռվածությամբ, մասնավորապես` պատերազմի հետևանքների վերաբերյալ փաստահավաք աշխատանքներիհետ կապված»,- ասվում է հաղորդագրության մեջ:
ԱՀ մարդու իրավունքների պաշտպանի աշխատակազմիցից հայտնում են, որ տարեկան հաղորդման ավարտին Պաշտպանը պատասխանել է պատգամավորների հարցերին:
