Ռուսաստանը Բելառուսին դժվարության պահին չի լքի։ Interfax գործակալության փոխանցմամբ՝ նման հայտարարություն է արել ՌԴ ԱԳ նախարար Սերգեյ Լավրովը Аргументы и факты լրատվամիջոցին տված հարցազրույցում: Նա հիշեցրել է, որ երկու երկրների հարաբերությունները հիմնված են եղբայրական և հաճախ ընտանեկան կապերի, ընդհանուր պատմության և հոգևոր արժեքների վրա:
«Ռուսաստանը, իհարկե, Բելառուսին դժվարության պահին չի լքի: Մենք միշտ պատրաստ ենք օգնել մեր հարևանին և ռազմավարական դաշնակցին»,- հավաստիացրել է նախարարը:
Լավրովը նշել է, որ Բելառուսում իրավիճակը, ընդհանուր առմամբ, կայունացել է, և «էմիգրանտ ընդդիմությանը, չնայած արտաքին աննախադեպ աջակցությանը, չի հաջողվի սասանել իրավիճակը»։ Ըստ Լավրովի՝ քաղաքացիների մեծ մասը հոգնել է «փողոցային անկարգություններից» և գիտակցել «դրանց անարդյունավետությունը»:
«Չնայած դրան, արևմտյան երկրները մեծացնում են ճնշումը պաշտոնական Մինսկի վրա, բայց միևնույն ժամանակ խոստանում են առատաձեռն տնտեսական օգնություն «ժողովրդավարության անցնելու» դիմաց: Արևմուտքցիներն այնքան են իջել, որ բելառուսական պետական ծառայողներին և իրավապահ մարմինների աշխատակիցներին սպառնում են միջազգային դատական հետապնդմամբ։ Միևնույն ժամանակ շարունակվում է լրատվական, քաղաքական և ֆինանսական լայնամասշտաբ աջակցությունը բելառուսական արտագաղթյալ ընդդիմությանը»,- նշել է արտգործնախարարը:
Լավրովը մտահոգություն է հայտնել նախագահի նախկին թեկնածու Սվետլանա Տիխանովսկայայի՝ 2021 թվականի օգոստոս-սեպտեմբեր ամիսներին Բելառուսում բողոքի ցույցեր անցկացնելու վերաբերյալ հերթական կոչերի կապակցությամբ: Նա հույս է հայտնել, որ «բելառուս ժողովուրդը իրեն հատուկ իմաստություն կդրսևորի և չի հետևի նրանց, ովքեր փորձում են իրավիճակն օգտագործել իրենց շահադիտական նպատակների համար»:
Հիշեցնենք՝ Բելառուսում ընդդիմադիր լրագրող Ռոման Պրոտասևիչի ձերբակալությունը միջազգային բուռն արձագանքի է արժանացել։ NEXTA տելեգրամ ալիքի նախկին գլխավոր խմբագրին ձերբակալել են, երբ Միսնկում արտակարգ վայրէջք է կատարել Աթենքից Վիլնյուս մեկնող ինքնաթիռը ռումբի տեղակայման մասին տեղեկությունների պատճառով։ Արևմտյան մի շարք երկրներ սպառնացել են պատժամիջոցներ սահմանել Բելառուսի նկատմամբ։ Միջադեպն այսօր քննարկվելու է Եվրամիության երկրների ղեկավարների գագաթնաժողովում։
