«Մոսկվան Հայաստանի փոխարեն իր խնդիրները չի լուծելու»,-«Առաջին լրատվական»-ի հետ զրույցում նման տեսակետ հայտնեց ռուսաստանցի քաղաքագետ Ստանիսլավ Տարասովը՝ խոսելով Սյունիքում ստեղծված իրավիճակի և այն Ռուսաստանի ջանքերով կարգավորելու հնարավորության մասին։
Մեր զրուցակիցն ընդգծեց՝ Հայաստանի սահմանը դատարկ է եղել, երբ ադրբեջանցիներն այնտեղ են մտել, ուստի պետք չէ սպասել, որ որևէ մեկը Հայաստանի փոխարեն կհարթի իրավիճակը.«Հիմա ուզում եք, որ ձեր փոխարեն տաջիկները, ուզբեկները՞ գան այնտեղ կանգնեն ու հարթեն իրավիճակը։Դուք չեք ուզում որևէ գործողություն իրականացնել ու փաստորեն սպասում եք, որ ձեր փոխարեն մենք դա անենք, ինչու՞։ Մոսկվան այստեղ ինչ կապ ունի, որ դիմում եք Մոսկվային։ Ես չեմ խոսում պատերազմ սկսելու մասին, ես խոսում եմ ընդամենը սեփական սահմանները պաշտպանելու մասին։ Պետք չէ Մոսկվայի հետ նման խաղ խաղալ, ո՞վ է նման խորհուրդներ տալիս Փաշինյանին։ Կարծում եք՝ Մոսկվան ոչինչ չի տեսնում ու չի՞ հասկանում։Հիմա եթե վաղը մի հոտ ոչխար անցնի ձեր սահմանը, նորից զանգելու եք Պուտինին ու խնդրեք կանգնեցնել նրանց»։
Տարասովի խոսքերով՝ չկա ռազմական ներխուժման ակտ, խնդիրը սահմանների դեմարկացիան է. «Խնդիրն այն է, որ Երևանն ու Բաքուն այս հարցի շուրջ պետք է երկխոսեն։ Կա նոյեմբերի 9-ի խաղաղ համաձայնագիր, որը և նախատեսում է նման կոնտակտներ։ Այո՛, Հայաստանն այժմ բարդ իրավիճակում է։ Սպասվում են ընտրություններ ու մանիպուլյացիաները շատ են։ Տարբեր ուժեր խաղարկում են Ղարաբաղի հարցը։ Մոսկվան զարմանքով հետևում է այս ամենին, բայց չի պատրաստվում խառնվել Հայաստանի ներքաղաքական կյանքին։ Դուք կորցնում եք պետականությունը և ոչ Սյունիքը։ Սյունիքն արդեն երրորդական հարց է և պետք է հենց այդ մասին մտածել»։
Քաղաքագետն ընդգծեց, ստեղծվում է տպավորություն,թե փորձ է արվում նամն միջադպերով ազդել ներքաղաքական պրոցեսների վրա.«Բաքվում շատ լավ հասկանում են, որ Հայաստանում ճգնաժամ է ու օգտվում են իրավիճակից։Հիմա լուրջ երկխոսելու համար Հայաստանում չկա որևէ մեկը։Կա խնդրահարույց տարածքների խնդիր, որը պետք է լուծի հատուկ հանձնաժողովը, բայց երկու կողմերի ուղիղ երկխոսությամբ։Հաշվի առեք նաև, որ ռուս խաղաղապահներն այնտեղ որևէ առաքելություն չեն իրականացնում, նրանք չունեն այդպիսի գործառույթ։ Շատ հարցեր պետք է մանրակրկտորեն քննարկվեն։Բայց ես առաջին հերթին կարևոր եմ համարում Հայաստանում ներքաղաքական ճգնաժամի հաղթահարումը։Քանի դեռ այդ ճգնաժամը կա՝ նմանատիպ միջադեպեր շատ կլինեն»։
Տարասովը նշեց՝ եթե Հայաստանի ու Ադրբեջանի ղեկավարները չեն կարող ուղիղ հանդիպում ունենալ, թող Երևանը դիմի Մոսկվային, որ նա նման հանդիպում կազմակերպի և ոչ թե պատերազմելու համար զորք խնդրի.«Թող այդ հանդիպումը լինի Ժնևում կամ Մոսկվայում կամ մեկ այլ քաղաքում, տարբերություն չկա։ Մոսկվան էլ այդ դեպքում կհայտարարի, որ Երևանը դիմել է նման հանդիպում կազմակերպելու խնդրանքով, բայց նման բան չկա, մեզ կանչում են՝ պատերազմելու։Ինչո՞վ է զբաղվում ձեր արտգործնախարարությունը։ Չե՞ն հասկանում՝ ինչ է կատարվում։ Հեծանիվ հորինելու կարիք չկա, կան ստանդարտներ, թե ինչպես են գործում նման իրավիաճկներում։ Չե՞ս կարողանում պայմանավորել հարևանիդ հետ, կանչի երրորդ մարդուն, որ օգնի քեզ այդ հարցում»։
