Իսրայելի բանակը հայտնել է, որ իրենց կործանիչները ոչնչացրել են ՀԱՄԱՍ-ի հետախուզության առանցքային ֆիգուրներին, այդ թվում՝ ռազմական հետախուզության անվտանգության բաժնի պետին և նրա տեղակալին՝ հակահետախուզության բաժնի պետին։ Այս մասին փոխանցում է RIA Novosti-ն։
Իսրայելի բանակը վերջին ժամերին հարվածներ է հասցրել Գազայի հատվածում բազմաթիվ թիրախների, հարվածները շարունակվում են։
Ավելի վաղ հայտնի էր դարձել, որ ՀԱՄԱՍ շարժման ռազմական թևը՝ «Ալ Քասամ ջոկատը» 100 հրթիռ է արձակել Իսրայելի հարավային Բեէր-Շևա քաղաքի ուղղությամբ՝ ի պատասխան Գազայի հատվածում տների վրա Իսրայելի օդուժի հարվածների վերսկսման։
Պաղեստինյան խմբավորումներն Իսրայելի ուղղությամբ զանգվածային կրակ են վարում նախորդ օրվա ժամը 18․00-ից։ Իսրայելը 5000 պահեստայիններ է կանչել՝ «Պատի պահապանները» օպերացիայի ժամանակ տարբեր ստորաբաժանումների համալրման համար։
Երեկ երեկոյան ժամերից սկսած՝ հնարավոր հրթիռակոծման մասին նախազգուշացնող տագնապի ավելի քան 15 ազդանշան է հնչել Թել Ավիվում և հարակից քաղաքներում։
