Աֆղանստանի մայրաքաղաքում շաբաթ օրը՝ մայիսի 8-ին տեղի ունեցած պայթյունների հետևանքով զոհերի թիվը հասել է 68-ի, կա 150-ից ավելի վիրավոր, հաղորդում է Reuters գործակալությունը։
Առաջին ռումբը գործի է դրվել ականապատ մեքենայի միջոցով։ Պայթյունը տեղի է ունեցել աղջիկների դպրոցի մոտ։ Երբ աշակերտուհիները սկսել են խուճապահար փախչել, ևս երկու ռումբ է պայթել։ Զոհերի մեծ մասը դպրոցի աշակերտուհիներն են։
Աֆղանստանի նախագահ Աշրավ Ղանին ահաբեկչության պատասխանատու է անվանել Թալիբան շարժմանը, սակայն թալիբները հերքում են իրենց առնչությունը պայթյուններին։
Գործակալությունը հաղորդում է, որ այսօր Աֆղանստանում ևս երկու պայթյուն է տեղի ունեցել։ Երկրի հարավային Զաբուլ նահանգում ավտոբուս է պայթեցվել, որի հետևանքով 11 մարդ մահացել է, 40-ից ավելին՝ վիրավորվել։
Իսկ արևելյան Պարվան նահանգում ավտոբուսի պայթեցման պատճառով առնվազն 2 մարդ է մահացել, 9 մարդ՝ վիրավորվել։
Աֆղանստանում ահաբեկչությունների թիվն ավելացել է վերջին շաբաթներին՝ այն բանից հետո, երբ ԱՄՆ-ն հայտարարեց, որ զորքերը դուրս կբերի մինչև սեպտեմբերի 11-ը՝ ԱՄՆ-ի վրա ալ-Քաիդայի հարձակումների 20-րդ տարելիցը։
