Պատմության մեջ առաջին անգամ Եվրամիությունն անվտանգության և պաշտպանության ոլորտում ԵՄ անդամ-երկրների համագործակցության ծրագրին (PESCO) է միացրել այլ պետությունների՝ ԱՄՆ-ին, Կանադային և Նորվեգիային։ Այս մասին ասվում է ԵՄ դիվանագիտության ղեկավար Ժոզեպ Բորելի հայտարարության մեջ։
«Իրականությունն այնպիսին է, որ մենք պետք է պատրաստվենք կյանքի այնպիսի աշխարհում, որտեղ առաջ են գալիս նոր վտանգներ և սպառնալիքներ, որոնց դեմ կարելի է պայքարել միայն միասին»,-հայտարարել է եվրադիվանագետը ԵՄ երկրների և վերոնշյալ պետությունների պաշտպանության նախարարների հանդիպման արդյունքներով։ Հանդիպմանը մասնակցել է նաև ՆԱՏՕ-ի գլխավոր քարտուղար Յենս Սթոլթենբերգը։
Ինչպես հայտնել է Բորելը, որոշվել է՝ զորքերի տեղաշարժի կազակերպման մասով ԱՄՆ-ի, Կանադայի և Նորվեգիայի փորձը ներառել ԵՄ ռազմական շարժունակության նախագծում։
Նախարարները քննարկել են ԵՄ-ի դերի ուժեղացմանն ուղղված քայլերը՝ որպես անվտանգության ոլորտի համակողմանի խաղացողի։
Եվրադիվանագիտության ղեկավարն առաջարկել է օպերատիվ փոխգործակցության արդյունավետության բարձրացման 3 ուղղություն․ բեռի բաշխում դաշնակիցների միջև՝ արագացնելու ԵՄ ռազմական կառույցների միջև որոշումների ընդունման մեխանիզմը, ճկունության ուժեղացում՝ օրինակ համակարգված ծովային ներկայություն, և երրորդ՝ աշխարհի տարբեր մասերում ԵՄ առաքելությունների և օպերացիաների ավելի արագ ծավալման պատրաստություն։
