Վրաստանը ստացել է AstraZeneca պատվաստանյութի 43 000 չափաբաժին: Հատուկ չվերթը տեղի է ունեցել մայիսի 6-ի առավոտյան: Հաղորդում է Aliq.Media-ն։
Ստացված պատվաստանյութի չափաքանակները կհատկացվեն այն անձանց, որոնք արդեն պատվաստվել են առաջին չափաբաժնով: Պատվաստման երկրորդ չափաբաժնով պատվաստվելու գրանցումը մեկնարկել է նախօրեին:
Վրաստանում պատվաստման գործընթացը մեկնարկել է մարտի 15-ից՝ միայն բժշկական ոլորտի աշխատողների համար: Ավելի ուշ պատվաստվողների խումբն ընդլայնվել է և պատվաստվել սկսել են նաև 65 տարեկանից բարձր քաղաքացիները:
Ապրիլի 27-ից մեկնարկել է 18 տարեկանից բարձր անձանց գրանցումը՝ չինական պատվաստանյութով պատվաստման համար: Այս պահի դրությամբ պատվաստման համար գրանցվել է 17 613 անձ: Ընդհանուր առմամբ, Վրաստանը ստացել է Sinopharm-ի 100 000 չափաբաժին:
