2010 թվականին «Ռուսալ-Արմենալ» ՓԲԸ-ն, որը մինչ այդ գործում էր կորստով, ապահովել է 3 մլրդ 660 մլն դրամի մաքուր շահույթ: Այդ մասին է վկայում կազմակերպության ֆինանսական հաշվետվությունը:
2009 թվականը «Ռուսալ-Արմենալ»-ը փակել է 18 մլրդ դրամ կորստով, 2008 թվականին կորուստը կազմել է 14 մլրդ: 2010 թվականին ընկերության եկամուտը աճել է 27.7%-ով՝ մինչև 29 մլրդ 400 մլն դրամ: Արտադրության ինքնարժեքը աճել է 26%-ով՝ մինչև 26 մլրդ 900 մլն դրամ: Գործառնական գործունեության արդյունքը դրական է եղել՝ 901 մլն դրամ, իսկ ֆինասական գործունեության արդյունքում ապահովվել է 2 մլրդ 760 մլն դրամի շահույթ:
Կազմակերպության ակտիվները 2009 թվականի 40 մլրդ 300 մլն դրամից 2010 թվականին աճել են մինչև 85 մլրդ 500 մլն դրամ: Ակտիվների նկատելի աճը պայմանավորված է 50 մլրդ 160 մլն դրամի մուրհակների բացթողմամբ: Կուտակված կորուստը կրճատվել է մինչև 52 մլրդ 700 մլն դրամ:
Առևտրական և այլ դեբիտորական պարտավորությունները կազմել են 4 մլրդ 700 մլն դրամ:
Հիշեցնենք, որ «Ռուսալ-Արմենալ» ՓԲԸ-ն համարվում է ՀՀ ամենամեծ արտադրական ձեռնարկություններից մեկը, ինչպես նաև Կովկասի և Կենտրոնական Ասիայի միակ փայլաթիթեղ արտադրողը:
